Japanese karatekas, ilalaban ang Pinas

KUALA LUMPUR – Sasabak ang dating miyembro ng Japanese national team para sa bayan sa 29th Southeast Asian Games.

Nagdesisyon si Junna Tsukii, 26, at Pinay ang ina na sumapi sa Team Philippines para makapagambag ng medalya sa -50 kilogram division ng kumite event sa karate.

Si Tsukii, second dan karate blackbelter, ay five- time AllJapan champion at beterano sa kompetisyon sa abroad. Ang ama niya na si Shin Tsukii ay nagsilbing coach ng Japan sa loob ng 20 taon.

“I want only gold,” sambit ni Tsukii, ipinanganak sa Pasay bago nanirahan sa Japan nang siyan’y tatlong taon na.

“My father convinced me to play for the country of my birth.”

Naapektuhan ang kanyang kampanya sa Japan nang magtamo siya ng injury sa anterior cruciate ligament (ACL) sa kanang tuhod noong 2015.

Nakabawi siya at nagawang manalo ng silver medal sa 10th Polish Open International Karate Grand Prix sa Bielsko, Poland.

Nitong April, nakopo ni Tsukii ang bronze medal sa US Open at gintong medalya sa Thailand Open karate championships at nagwagi rin ng ginto sa Canadian Open nitong Hunyo.

Sisimulan niya ang kampanya ngayon ganap na 11:00 ng umaga sa Kuala Lumpur Convention Center Hall 1.

Kabilang din sa koponan sina Jayson Ramil Macaalay sa men’s kumite -60 kg, Miyuki Tacay sa women’s kumite +68 kg at Rexor Tacay sa men’s kumite -67 kg.