‘Small’ sa R6.4- B shabu probe, tropa ni Paolo

Kinumpirma kahapon ng broker na umano’y may pangunahing papel sa pagpupuslit sa Bureau of Customs (BoC) ng P6.4-bilyon shabu shipment mula sa China na si Davao City Councilor Nilo Abellera, Jr., na malapit kay Davao City Vice Mayor Paolo Duterte, ang sinasabi niyang “Small” na isa sa mga miyembro ng “Davao Group” na nakatransaksiyon niya.

Dahil dito, muling nakaladkad ang pangalan ng anak ni Pangulong Duterte sa isinasagawang imbestigasyon ng Senado hinggil sa paglusot sa BoC ng nasabing kontrabando.

Una nang ipinatawag si Abellera, batay sa kahilingan ni Senador Antonio Trillanes IV dahil sa pagbanggit ng broker na si Mark Taguba sa pangalan nito bilang isa sa mga namumuno sa Davao Group, at kilalang malapit sa nakababatang Duterte.

Sinabi ni Trillanes na kailangang makadalo si Abellera para magbigaylinaw kung may alam ang bise alkalde sa usapin o nagagamit lamang ang pangalan nito.

Sa pamamagitan ng mga ipinakitang larawan ni Trillanes, kinumpirma ni Taguba na si Abellera ang kasama ni Duterte sa litrato.

Sinabi pa ni Taguba na nagkita sila ni Abellera sa Davao City at nagbigay umano siya ng P5 milyon bilang “enrolment fee” para payagang makapasok sa BoC ang kanyang mga kargamento, kasunod ng pagbibigay din ng P10,000 bawat container o P1 milyon kada linggo.

Ipinakita rin ni Taguba ang natanggap niyang text message na nagbanggit sa pangalan nina Abellera, Paolo at Pulong, at isang “Tita Nanie”.

Kaugnay nito, nangako naman si Pangulong Duterte na ipakukulong niya ang mga sangkot sa pagpupuslit sa bansa ng nasabing shabu, na nasa 600 kilo, kabilang na ang mga tauhan mismo ng BoC.

“In due time, I will ask for the neck of those involved. Not only that we have to prosecute them criminally,” sabi ni Duterte. “Remember it is a nonbail (offense). Kung lahat ng involved d’yan na taga-Customs will have to go to jail without bail. Lahat ‘yan, kasi conspiracy ‘yan.”