Tambay binoga, kagawad napagkamalang suspek
Patay ang isang lalaki nang pagbabarilin ng truck driver at pahinante nito habang nakatambay sa gilid ng kalsada, at sugatan naman ang isang barangay kagawad matapos mapagkamalang suspek sa Rodriguez, Rizal, kamakalawa ng gabi.
Naisugod pa sa Barangay Kasiglahan Infirmary si Errol Cortez, 24, ngunit binawian din ng buhay, habang patuloy na inoobserbahan sa Amang Rodriguez Medical Center si Nelson Beliza, kagawad ng Barangay Macabud, na nabaril ni PO1 Christopher Linco.
Sa ulat ng Rodriguez Municipal Police Station, naganap ang pamamaril sa gilid ng kalsada sa Sitio Harangan, boundary ng Bgy. San Isidro at Bgy. Macabud, dakong 9:00 ng gabi.
Ayon sa isang testigo, na tumangging magpabanggit ng pangalan, nakatambay si Cortez sa lugar at makalipas ang ilang sandali ay bumaba ang driver at pahinante ng truck, na may bitbit na itak, ngunit agad ding bumalik sa sasakyan ang dalawa.
Gayunman, muli umanong bumaba mula sa truck ang mga suspek at nakipagsuntukan kay Cortez.
Nakarinig din ang testigo ng mga putok ng baril at nang tingnan ay duguang nakahandusay ang biktima at mabilis namang nagsitakas ang mga suspek.
Agad namang rumesponde si Beliza at isang barangay tanod, sakay sa isang motorsiklo, at hinabol ang mga tumakas na suspek.
Nakasalubong ng dalawa ang mga rumerespondeng pulis at binaril umano ni PO1 Linco si Beliza.
Ayon kay Police Supt. Hector Grijaldo, hepe ng Rodriguez PNP, posibleng napagkamalang suspek ang kagawad.
Patuloy ang imbestigasyon sa insidente.