Umawat sa gulo ginulpi, sinaksak
Nasa malubhang kalagayan ang isang negosyante matapos pagtulungang gulpihin at saksakin ng tatlong lalaki na nakatalo nito sa loob ng videoke bar sa Navotas City, kahapon ng madaling araw.
Kasalukuyang ginagamot sa ospital si Mark Anthoy Cona, 29, ng No. 16 Nadela Street, Barangay Tangos ng nasabing lungsod, na nagtamo ng mga saksak sa katawan at mga pasa sa mukha.
Arestado ang isa sa mga suspek na si John Loyd Dingcong, 28, ng No. 242 Gov. Pascual St., Bgy. Sipac Almazen, habang tinutugis naman ang dalawa niyang kasama na kinilala sa alyas na “Ryan” at “Louie”.
Sa ulat ng pulisya, umiinom si Cona at ang kanyang kaibigan na si Lester Paco sa Mr. Dimzon Chinese Cusine, na matatagpuan sa No. 123 Cadomiga St., Bgy. Navotas West, dakong 3:00 ng madaling araw. Nasa kabilang lamesa naman ang mga suspek at umiinom din.
Nag-request ng kanta sina Paco at Cona ngunit nang tugtugin ito, si Dingcong ang kumanta.
Tumayo umano si Cona para bayaran ang kanilang ininom habang naghihimutok si Paco papalabas ng videoke bar.
Napansin ni “Louie” ang nakasimganot si Paco kaya kinumpronta niya ito at inawat ni Cona.
Dito na lumusob sina Dingcong at “Ryan” at ginulpi saka sinaksak si Cona.
Nagawang makatakas, sakay sa motorsiklo, nina Ryan at Louie at naiwan si Dingcong kaya naaresto ng rumespondeng mga pulis.
Nahaharap ang suspek sa kasong frustrated homicide.