Monster traffic ngayong ‘ber months’
Aminado ang Metropolitan Manila Development Authority (MMDA) na mahirap at matagal pa bago masolusyunan ang matinding trapiko sa mga lansangan sa Metro Manila, lalo na dahil sobra-sobra ang bilang ng mga sasakyan na pangunahing sanhi nito.
Sa isang pulong balitaan, sinabi ni MMDA Chairman Danilo Lim, na taun-taon ay nadadagdagan ang mga sasakyan sa mga lansangan dahil sa paglago ng industriya ng mga sasakyan sa bansa.
Aniya, ngayong pumasok na ang “ber” months ay mas titindi pa ang trapikong mararanasan ng mga motorista at pasahero sa EDSA, dahil palalalain pa ito ng dagsa ng mga mamimili sa mga shopping mall.
Sa taya ni Lim, aabot sa recordhigh na 450,000 hanggang 500,000 ang mabebentang sasakyan sa pagtatapos ng taon, higit na malaki sa 417,000 naibenta noong 2016.
Nasa 35 porsiyento rin, aniya, ang kabuuang bilang ng mga sasakyan sa bansa na nagsisiksikan sa Metro Manila.
Bukod pa dito ang uumpisahang mga imprastruktura, gaya ng karagdagang terminal ng tren at mga highway, na tiyak nang magdudulot ng matinding trapiko ang malawakan o sabayang konstruksiyon.
Aniya, matagal-tagal pa ang kalbaryo na mararanasan ng publiko sa usapin ng trapiko.
“Tiyaga-tiyaga lang po muna at matagal pang masosolusyonan ang trapiko, dahil nagpapatuloy pa ang mga major road infrastructure projects ng gobyerno” sabi ni Lim.
Sinabi rin ni Lim na ang pagtatayo ng subway at iba pang proyektong imprastruktura ang pinakamainam na solusyon sa pagsisikip ng trapiko sa Metro Manila.