Iregularidad sa ‘Yolanda’ rehab pinaiimbestigahan

BORONGAN, Eastern Samar – Kinondena kahapon ng isang senior administration congressman ang multi-milyong pisong iregularidad sa pagtatayo ng mga pabahay para sa mga biktima ng bagyong ‘Yolanda’, sinabing ang mga bahay ay gawa sa mababang klase ng construction materials.

Daan- daang governmentfunded housing unit para sa mga biktima ng bagyong Yolanda ang iinspeksiyunin matapos umanong makipag- ugnayan ng mga contractor sa mga ‘ di kuwalipikadong sub-contractor, pagsisiwalat ni Negros Occidental Rep. Alfredo “Albee” Benitez.

Ayon kay Benitez, chairman ng House Committee on Housing and Urban Development, ibinulgar ang anomaly sa isang public hearing na isinagawa ng house panel dito.

“Our people have been victimized twice over. First, by supertyphoon Yolanda and now by crooked contractors and their cohorts,” pahayag ni Benitez.

Nagpahayag ng pagkabahala si Benitez na maulit ang nasabing anomalya sa iba pang housing and community-building projects para sa mga biktima ng Yolanda.

Sa isang congressional hearing dito, sinabi ni Camilo Salazar, subcontractor, na mababang klase ng materyales ang ginamit sa pagtatayo ng mga bahay sa Balangiga, Eastern Samar.

Sinabi ni Benitez na ayon kay Salazar, kabilang sa mga construction materials na ginamit ay ang mga hindi akmang steel bars at mumurahing semento.

Sinabi rin na ang mga materyales sa bubong ay mababa ang kalidad.

Inamin ni Salazar na siya ay isang subcontractor na kinausap ng isang Juanito Tayag para tumulong sa pagtatayo ng mga bahay sa mga sinalanta ng Yolanda.

Nanawagan si Benitez sa National Housing Authority na imbestigahan ang iregularidad.

“It involves people’s money and the future of Yolanda victims. We need to get to the bottom of all of these,” diin ni Benitez.

Bilang tugon, ipinangako ni Eastern Samar Rep. Ben Evardone na mananagot ang mga may sala.