Nat’l ID system lusot na sa Kamara

Ipinasa ng Kamara sa ikatlo at pinal na pagbasa kahapon ang panukalang lilikha ng universal identification (ID) card system para sa lahat ng transaksiyon sa pamahalaan.

Lumusot ang House Bill (HB) No. 6221 o Act Establishing the Filipino Identification System (FilSys) sa botong 142 pabor, pitong kontra, at walang nag-abstain.

Ang FilSys cards ay machinereadable identification cards na maglalaman ng iba’t ibang datos tungkol sa cardholder. Pagsasama- samahin dito ang lahat ng umiiral na government-initiated identification (ID) systems.

Magagamit ang mga card para sa identification at lahat ng transaksiyon sa pamahalaan. Halimbawa, maaari itong gamitin bilang social security card, tax information card, health card at iba pang government- issued identification cards.

Ang pitong mambabatas na bumoto kontra sa pagpasa ng panuka ay pawang miyembro ng Makabayan, ang leftist bloc sa Kamara.

“The National ID system proposal is a Marcosian or authoritarian measure, and it will transform our country as a police state, where the people is under constant shadowing by government agents, which is a gross violation of right to privacy, liberty, safety, security and life,” anang Anakpawis Party-List Rep. Ariel Casilao.

Giit niya, lilikha ng seryosong problema ang pagkakaroon ng gobyerno ng access sa personal information ng mamamayan.