Biographical marker ni Marcos sa Batac City
BATAC CITY, Ilocos Norte – Pormal nang pinasinayaan ang biographical marker ni dating Pangulong Ferdinand E. Marcos, na nagmula sa National Historical Commission of the Philippines ( NHCP), sa kalilipat lamang na bantayog na “Daytoy ti Bannawag” sa Batac City, Ilocos Norte, kahapon ng umaga.
Isa ang seremonya sa mga pinakaaabangan sa selebrasyon ng ika-100 anibersaryo ng kaarawan ni dating Pangulong Marcos.
Ang monumento, na obra ng Italian na si Giuseppe Marinucci, ay pinasinayaan noong 1977 para sa ika-60 kaarawan ng dating Pangulo at orihinal na katabi ng kasalukuyang Marcos Museum.
Ipinanganak si Marcos noong Setyembre 11, 1917, at namatay sa Honolulu, Hawaii, noong 1989. Inihimlay siya sa Libingan ng Mga Bayani (LNMB) sa Taguig City noong Nobyembre 18, 2016.
Ibinagi ni Ilocos Norte Tourism Office Aian B. Raquel na, “It's a very significant event that will serve as a real commemoration for the centenary of Ferdinand Marcos as a president because it's the first standard-issue government marker that says he's a former soldier, a former president.”
Ang bagong lokasyon ng 40-anyos na monumento at ang biographical marker ng NHCP ay matatagpuan sa harapan ng Immaculate Concepcion Parish, katapat ng Imelda Cultural Center.
Ang kanyang ika-100 kaarawan ngayong Lunes ay ipagdiriwang sa magkakasunod na flag-raising at wreath- laying ceremonies sa buong Ilocos Norte, at susundan ng pagpaparangal sa kanyang puntod sa LNMB sa Taguig.