IPhone X, paalam na sa ‘home’ button
CUPERTINO, Calif. (REUTERS/ AP)—Pinasinayaan ng Apple Inc nitong Martes ang pinakaaabangang iPhone X (“ten”), gawa sa glass at stainless steel na may edge-to-edge display, na ayon kay Chief Executive Tim Cook ay “the biggest leap forward since the original iPhone.”
Ang iPhone X ay may wireless charging, infrared camera at hardware para sa facial recognition, kapalit ng fingerprint sensor para mabuksan ang phone. Wala na ang home button, na bumago sa smartphones nang ito ay ipakilala ni Steve Jobs isang dekada na ang nakalipas, at sa halip ay ita-tap lamang ng users ang device para ito ay magising.
Ngunit sa on-stage presentation ni Apple Senior Vice President Craig Federighi, hindi gumana ang Face ID unlocking sa first attempt.
Ang 10th anniversary iPhone, nagsisimula sa presyong $999, ay dadalhin sa mga tindahan sa Nobyembre 3.
Pinasinayaan din ng Apple ang bagong iPhone 8 at mas malaking 8 Plus na may upgrade sa camera, display at speaker.
Ang mga phone na ito, ayon sa Apple, ay kukuha ng larawan na mas malilinaw, mas matitingkad ang kulay, at walang gaanong distortion, lalo na sa low-light settings. Gagamit ang display ng ambient lighting, na katulad sa feature ng ilang iPad Pro models. Mas magiging malakas ang speaker at mas malalim ang bass, at gagamit din ng wireless charging.
Ipinakilala rin ng kumpanya ang updated version ng Apple TV 4K at bagong Apple Watch model na may cellular service.
Ito ang unang product event ng Apple sa bago nitong headquarters sa Cupertino, California. Nagsimula ang programa sa pagbibigay-pugay ng kumpanya kay Apple co-founder ng Steve Jobs, na pumanaw noong 2011.
Sinabi ni Cook na isang habambuhay na karangalan na siya ang magbubukas ng Steve Jobs Theatre sa Apple Park campus. “Today and always, we honour him,” aniya.