Diktadurya sa demokrasya

SA pakiramdam ng maraming Pilipino, parang umiiral ngayon sa Pilipinas, isang demokratikong bansa, ang isang uri ng diktadurya. Noong panahon ni ex-Pres. Ferdinand Marcos, namayagpag ang dictatorship dahil idineklara ang martial law sa buong bansa. Subalit ngayon, wala namang martial law maliban sa Mindanao bunsod ng pag-okupa at karahasan ng teroristang Maute Group na kasabwat ang bandidong Abu Sayyaf Group sa Marawi City.

Sa analisis at pagsusuri ng mga mapagmasid sa mga isyu at pangyayari ngayon sa ating bansa, nagagawa ng administrasyon ang kagustuhan nito dahil ang Kongreso (partikular ang Kamara) ay nagmimistulang isang “rubber stamp” at sunud-sunuran sa Sangay ng Ehekutibo; ang Hudikatura ay tinatakot sa pamamagitan ng impeachment sa mga pinuno nito, at bantang pagpapatalsik sa mga hukom.

Halos lahat ng mga opisyal ng iba’t ibang ahensiya at departamento ng pamahalaan ay nanginginig sa takot dahil sa bantang sila’y patatalsikin sa pamamagitan ng paghahain ng mga kaso na “inimbento” lamang o kaya naman ay may katotohanan. Kapag ayaw ng pangulo ang isang ahensiya o constitutional body, tulad ng Commission on Human Rights (CHR), napasusunod ang Kongreso, lalo na ang Kamara, na hindi bigyan ng angkop at sapat na budget/ pondo.

Ganito ang nangyari sa CHR na binigyan lang ng P1,000 budget para sa 2018. Ganito rin ang nangyari sa kinaiinisang tanggapan ni President Rodrigo Duterte (PRRD), ang Energy Regulatory Commission (ERC), at ang National Commission on Indigenous Peoples (NCIP) na pinagkalooban lang ng tig-P1,000 sa susunod na taon. Papaano magagampanan ng mga ito ang kanilang mandato at tungkulin kung pagkakaitan ng karampatang pondo/budget? Kung asar si PDU30 kay CHR Chito Gascon, sikaping siya ay mapatalsik pero huwag parusahan ang CHR.

Pinagbibintangan ni Sen. Antonio Trillanes IV si Davao City Vice Mayor Paolo Duterte na miyembro ng Chinese triad o crime rings sa pamamagitan ng pagpapakita ng kanyang tattoo sa likod na isang may kulay na dragon at may mga code. Tumanggi ang presidential son. Gayunman, sinabi ni VM Polong na naghihintay lang siya ng tamang panahon para pasinungalingan ang alegasyon ni Trillanes na siya ay kasapi ng Chinese triad na nagpupuslit ng mga droga sa ‘Pinas. ...

Binalewala lang ng Malacañang ang nilagdaang bank waiver ni Trillanes matapos siyang akusahan ni Mano Digong na mayroong mga nakadepositong pera sa ibang bansa. Para kay DoJ Sec. Vitaliano Aguirre II, ang bank waiver ni Trillanes ay “futile and all for show.” Hindi raw ito magagamit para patunayan ang alegasyon ng kanyang hidden wealth.

Sa kabilang dako, matindi ang hamon ni Trillanes kay PRRD na dapat ay lumagda rin sa isang waiver upang buksan ang kanyang mga bank account para patunayan na wala siyang nakurakot na pera sa pamamagitan ng kurapsiyon. Naghihintay ang taumbayan sa Trillanes waiver versus Duterte waiver upang malaman ang buong katotohanan kung sino ang sinungaling at kung sino ang nagsasabi ng totoo!