Nadagdag sa bahagi ng kasaysayan
MAYnadagdag na pangyayari sa kasaysayan ng iniibig nating Pilipinas. Ang ipinahayag na National Day of Protest ni Pangulong Rodrigo Duterte na isinabay sa paggunita ng ika-45 taon ng martial law na ideneklara ni dating Pangulong Ferdinand Marcos noong Setyembre 21, 1972.
Sa pagpapahayag ng National Day of Protest, inanunsiyo ng tambolero ng Malacañang na walang pasok ang mga tanggapan ng pamahalaan sa buong bansa at walang klase ang mga pampublikong paaralan.
Layunin ng protesta na mabigyan ng pagkakataon ang mga Pilipino na magpahayag ng kanilang saloobin sa gobyerno gayundin ang mga nagtatrabaho sa pamahalaan. Sa bahagi ng pahayag ng Pangulo, siya rin ay magpoprotesta sapagkat maliit ang kanyang suweldo. Marami ang nagtaas ng kilay. May mga private school at unibersidad sa Metro Manila ang nagkansela ng klase upang bigyan ng pagkakataon ang mga mag-aaral at guro na lumahok sa kilos-protesta.
Bilang bahagi ng paggunita sa ika-45 anibersaryo ng martial law, nagprotesta ang mga militanteng grupo at organisasyon. Sa Mendiola, namulaklak ang mga hawak na bandila ng militanteng grupo. Binatikos ng mga lider at mga nagsalita sa programa ang administrasyong Duterte at ang inilunsad na giyera kontra droga na marami na ang napapatay. Sa mga hawak na streamer at placard, madidilat ang mga katagang, “Never Again sa Martial Law!” at “Stop the Killings!”
Tampok na bahagi rin ng kilosprotesta ang pagsunog sa magkakasamang malaking larawan nina Pangulong Duterte, dating Pangulong Marcos at Hitler. Pagkatapos, naglakad ang militanteng grupo patungong Rizal Park upang sumapi sa mga nagra-rally doon. Naiwan sa Mendiola ang mga nagra-rally na pawang pro-Duterte.
Sa Plaza Miranda, nag-rally ang mga tagasuporta ni Pangulong Duterte. Dumalo ang ilang mga miyembro ng gabinete ng Pangulo. Ang mga nag-rally ay mula sa iba’t ibang lungsod sa Metro Manila. Libreng sakay sa mga bus at pinakain sila ng lugaw at tinapay. Libre rin ang tubig na kanilang ininom.
Binatikos ng grupong “Karapatan”, na lumahok sa rally sa iba’t ibang bahagi ng Metro Manila, si Pangulong Duterte sa pagsasabing ang Pangulo at ang kanyang security cluster ay nagsasagawa ng mga taktikang ginawa ni dating Pangulong Marcos.
Sa homily naman ng mga obispo, hindi nakaligtas sa batikos si Pangulong Duterte. Sa bahagi ng homily ni Archbishop Socrates Villegas, ng Lingayan-Dagupan at pangulo ng Catholic Bishops’ Conference of the Philippines (CBCP), sinabi niya na nawawala na ang ating pambansang kaluluwa sa Ama dahil sa mga kasinungalingan at Prinsipe ng kadiliman na ang tinutukoy ay ang demonyo. Pinapatay ang mahihirap at nilalason ang ating kamalayan. Habang ipinaiiral ang martial law sa Mindanao, mahigit na sa 13,000 katao ang tumimbuwang sa giyera kontra droga.
Ang pagbabagong kailangan natin, ayon pa kay Archbishop Villegas, ay pagbabagong para sa kabutihan, hindi sa pagbabagong mula sa buhay ay patungo sa kamatayan. Kailangan natin ang pagbabago mula sa dilim patungo sa liwanag. Kailangang tumindig ang mga Pilipino at kumilos ng may dignidad, kagalang-galang, matapat at matatapang na mamamayan.
Ayon naman kay Sister Mary John Mananzan, na pinangunahan ang “Movement Against Tyranny”, may kadiliman na lumalatag sa ating bansa. Kailangang magkaisa tayo upang mapigil ang kadilimang ito. Tutulan natin ang pagpatay sa mga kabataan.
Nakahinga nang maluwag at nagpasalamat ang ating mga kababayan na sa idinaos na mga kilos-protesta sapagkat naging maayos at walang napahamak.