‘Code of silence’ sagabal sa hazing investigation

Sinabi kahapon ni Justice Secretary Vitaliano Aguirre II na ang “code of silence” sa mga fraternity at ang pagbabanta sa mga posibleng testigo ay sagabal sa imbestigasyon sa pagkamatay ng hazing victim na si Horacio “Atio” Castillo III.

Ngunit hinikayat ni Aguirre ang mga testigo na lumantad at nakiusap sa Aegis Juris fraternity ng UST na makipagtulungan sa imbestigasyon.

“I ask them to come out and tell the truth and we will protect them under the Department of Justice’s (DoJ) witness protection program (WPP). They should trust us instead of those people hiding them or advising them not to come out,” aniya.

Kinumpirma ni Aguirre na may natatanggap nang banta sa buhay ang dalawang testigo na lumapit sa kanyang tanggapan.

“They are afraid because they already received threats. They have not submitted affidavits yet despite our assurance to cover them under the WPP,” ayon kay Aguirre.

Aniya, posibleng hindi makuha ng DoJ ang buong kooperasyon ng dalawang posibleng testigo.

“So that’s a problem. We don’t know if they’ll cooperate,” ani Aguirre. INITIATION PARA SA ‘BONDSHIP’—LACSON Kinakailangang magsagawa ng initiation rites upang bumuo ng “bondship” at ang mga miyembro ng fraternity organization, ayon kay Senator Panfilo Lacson.

Ngunit habang kinokondena ang pagkamatay ni Castillo, sinabi ni Lacson na naiintindihan niya kung bakit mayroon pa ring hazing sa kabila ng mga paraan upang ipagbawal ito at kung bakit kinakailangang sumailalim sa matinding initiation rites ang mga miyembro ng fraternity o sorority organizations.

“From my experience in the PMA, even cavaliers share this, it is primarily needed for bondship. Plus it’s needed to instill discipline. Because it’s sweeter when you get recognized after going through something dangerous,” pahayag ni Lacson sa panayam sa radyo.

HAZING ‘DI KAILANGAN—ROBREDO

Bakit kailangan magkasakitan?

Ito ang naging pahayag kahapon ni Vice President Ma. Leonor “Leni” Robredo sa pagkamatay ni Castillo.

“Napakalungkot. Hindi naman kinakailangan mangyari. Ang tanong natin bakit nangyayari?” pahayag ni Robredo sa kanyang weekly radio show, “BISErbisyong Leni.”

Sinabi ng Bise Presidente na hindi kinakailangang sumailalim sa matinding initiation rites, gaya ng hazing, ang mga bata para maging fraternity members.

“Sinasabi kaya nagkakaroon ng hazing kasi ito iyong parang sukat gaano ka kadesido maging bahagi ng grupong ito. Marami ibang paraan para masukat mo paano maging kadesido iyong isang tao para sumali (sa fraternity),” sabi ni Robredo. PAGBAWAL SA HAZING PINABORAN NG CHED Pabor ang Commission on Higher Education ( CHED) na tuluyan nang ipagbawal ang hazing sa pamamagitan ng pag-amyemda sa Anti-Hazing Law of 1995, ngunit tutol naman itong buwagin ang fraternities at sororities sa bansa.

Nagbigay ng pahayag si CHED Executive Director Julito Vitriolo kasunod ng pagpatay kay Castillo.

“Matagal na rin naming minumungkahi na dapat rebisahin ang batas na ito kasi unang una, ‘yung hazing and other forms of initiation rites na dangerous sa security ng estudyante o ng tao ay dapat hindi na hinahayaan. Dapat immediately prohibited ‘yan or outlawed,” ani Vitriolo, sa panayam sa radyo.

“Medyo (may) depekto ‘yung batas, parang merong implicit or even expressed recognition na kailangan mo pa ng notice (na magsagawa ng hazing), wala namang gumagawa niyan (bago ang notice)... Ang tingin ko dapat ito ipagbawal nang tuluyan,” aniya pa.

Sa kabila nito, tutol si Vitriolo na tuluyan nang buwagin ang mga fraternities at sororities.

“Hindi dapat tanggalin ‘yan (fraternities), dapat ‘yung fraternity i- recognize na organization na merong positive inputs sa society, productive... I-regulate ‘yan but yung bad practices niya ang ipagbawal,” aniya pa.