Bumabawi ang HOR

“SA loob at labas ng bayan kong sawi/ kaliluha’y siyang/ nangyayari hari/ kagalinga’t bait/ ay nalulugami/ ininis sa hukay/ ng dusa’t pighati”. Bahagi ito ng binigkas na daing at pagdurusa ni Florante sa nobelang “Florante at Laura” ni kababayang Balagtas (Francisco Baltazar: Abril 2, 1788-Pebrero 20, 1862). Ibinulalas ni Florante ang umiiral noon na kasamaan, kaliluhan at pagsasamantala ng may kapangyarihan. Isinulat niya ang nobela habang siya ay nakakulong at ipinalimbag ito nang siya’y makalaya noong 1838.

Sa panahon natin ngayon, parang ang ibinigkas at idinaing ni Florante, halos 200 taon ang nakalilipas, ang siyang nangyayari. Ang namamayagpag ngayon ay mga insidente ng kasamaan at kawalang-konsensiya---patayan, illegal drugs, kurapsiyon, puslitan ng shabu (sa BoC), murahan, fake news, pagkakaroon ng mga kabit, paghahariharian ng Kongreso (partikular ang Kamara) sa pamamagitan ng banta ng impeachment at contempt of court.

Nitong huling mga araw, bumabawi ang Kamara o House of Representatives (HOR, hindi Whore) nang ibalik nito ang budget ng Commission on Human Rights (CHR) na P678 milyon para sa 2018. Ibinalik din ng House of Alvarez, este House of Reps., ang mga budget para sa 2018 ng Energy Regulatory Commission (ERC) at ng National Commission on Indigenous People (NCIP). Ang desisyong hindi na ituloy ang unang P1,000 budget para sa tatlong ahensiya ay narating matapos magpulong sina Alvarez, Majority Leader Rodolfo, Davao City Rep. Karlo Nograles, chairman ng House committee on appropriations.

Ibinasura rin ng House committee on justice ang reklamong impeachment laban kay Comelec chairman Andres Bautista. Tuwang-tuwa si Mang Andres habang dismayadong- dismayado naman ang kanyang ginang na si Patricia. Natagpuan ng komite na kulang sa porma (insufficiency in form) ang reklamo laban kay Bautista kaya siya ay immune o hindi puwedeng ahinan uli ng reklamo sa loob ng isang taon. Sa botohang 26-2, itinapon ng komite ni Mindoro Oriental Rep. Reynaldo Umali sa basurahan ang reklamo laban kay Chairman Andy.

Kahit medyo “mabait” si President Rodrigo Roa Duterte ( PRRD) sa ginawang kasamaan o atrocities ng Marcos regime noong martial law, ang kanyang proklamasyon kahapon, ika-45 taong anibersaryo ng ML, bilang isang National Day of Protest ay pagkilala sa “gross human rights violations” ng batas-militar ng iniidolo niyang ex-Pres. Ferdinand Marcos.

Bilang tagapangalaga o protector ng bansa at ng Constitution, tiniyak ng military (Armed Forces of the Philippines) sa mga Pilipino ang commitment nito sa demokrasya at kalayaan. Sinabi ni Maj. Gen. Restituto Padilla, Jr., spokesman ng AFP, na ang martial law ngayon (sa Mindanao) ay kakaiba sa martial law noong panahon ni Marcos. Bunsod ng mga protesta sa iba’t ibang dako ng bansa, sinabi ni Padilla na igagalang ng militar ang karapatan ng mamamayan na magpulong at magprotesta.

Naniniwala si Sen. Antonio Trillanes IV na napatunayan niyang isang “sinungaling” si PRRD tungkol sa isyu ng bank accounts niya sa ibang bansa. Hinimok niya si Mano Digong na lubayan na ang kung anu-anong excuses at pumayag siyang pabuksan ang bank accounts para masuri ng taumbayan. ...

“Nabisto na kaya nagpapalusot. Wala nang lusot dito, kumbaga, eh pusoy na pusoy na”, kantiyaw ng senador.

Kahit nahaharap sa impeachment complaint, pinangunahan ni SC Chief Justice Ma. Lourdes Sereno ang paggunita sa ika-45 taong anibersaryo na martial law declaration sa pamamagitan ng unveiling sa monumento ng yumaong freedom fighter Jose Diokno sa CHR, ang ahensiya na kinaaasaran ni PDU30 at ng mga alyado sa Kongreso.

Iniutos ni Pres. Rody na barilin ng mga pulis ang anak niyang si Davao City Vice Mayor Paolo Duterte kapag napatunayang sangkot sa illegal drugs. Sina VM Duterte at son-in-law Atty. Mans Maneses ay idinadawit sa P6.4 billion shabu shipment mula sa China na pinalulusot sa Customs. Itinanggi ng dalawa ang pagkakasangkot. “Ang order ko nga noon na pag may anak ako na nasa droga, patayin ninyo para walang masabi ang tao”, sabi ni PRRD. Snabihan daw niya si VM Polong na ipapatay siya sa mga pulis kapag siya ay sangkot sa illegal drugs. Palakpakan natin ito!