TANBULISLIS
Ika-28 labas
“MALAMBOT ang gulong na ito,” wika ng pahinante. “Imposible ang pangyayaring ito dahil pinalo ko ang lahat ng gulong kanina, maganda ang tunog, kargadong kargado ng hangin!”
“Baka naman nagkamali ang dinig mo,” sagot ng magmamaneho ng malaking trak.
“Lalong imposible ‘yun,” sagot ng pahinante. “Kabisadung-kabisado ko ang tunog ng malambot at kulang sa hangin na gulong!”
“Hindi kaya kagagawan ng nilikhang tambulislis??” Tanong ni Mang Abe.
“Baka nga, Mang Abe,” sang-ayon ng pahinante. “Dahil kanina ng iwan ko ang sasakyan okey ang hangin!”
“Totoo man o hindi ang hinala natin, sakay na kayo, aalis na tayo. Hindi problema ang mahinang hangin sa hulihang gulong, makakatakbo pa ng normal ang sasakyang ito,” paliwanag ng nagmamaneho.
Matapos ang pagsasalita, umakyat ang nagmamaneho sa unahang bahagi ng malaking sasakyan kasunod si Mang Abe para maupo sa tabi niya. Ang mga kalalakihan nilang kasama, nag-akyatan sa likuran ng trak at naupo sa mga nakasalansang kawayan. At dahil maganda ang kondisyon ang trak, isang ikot lamang ng susi sa susian, nabuhay ang makina ng damduhalang sasakyan ngunit hindi muna ito pinatakbo ng nagmamaneho. Dahil nasa hindi kalayuang damuhan ang mga tambulislis, nakikita ng mga nilikha ang nangyayari sa malaking sasakyan. At gamit ang kapangyarihang makapaglakbay na nakalutang sa hangin na hindi nakikita ng mga tao, nagawang makasakay ng mga tambulislis sa trak para gawin ang nabuong balak sa nagmamaneho ng lider na si Malut.
Matapos ang ilang minutong pag-andar ng makina ng malaking trak, magkakasunod na kumilos ang paa at kamay ng nagmamaneho para patakbuhin ang sasakyan sa kahabaan ng barangay road. At dahil hindi maganda ang kondisyon ng kalsada, dahandahan ang ginawang pagpapatakbo ng nagmamaneho habang kausap si Mang Abe. Dahil hindi nakikita ng tao, nagawa ng lider ng mga tambulislis na si Malut na makapasok sa loob ng trak na kinaroonan ng visitador at nagmamaneho.
Lihim na napangiti ang tambulislis ng makitang nakasuot lamang ng tsinelas ang nagmamaneho ng sasakyan dahil magagawa ang gustong gawin sa talampakan ng lalaking papalit-palit ang pagtapak sa clutch, selinyador at preno. Walang sinayang na sandali si Malut, kaagad niyang kiniliti ang talampakan ng nagmamaneho dahilan para mawala ang sasakyan sa binabagtas na kalsada at mabalaho sa maputik na gilid ng barangay road. Muli, mabilis na kumilos ang mga kamay at paa ng nagmamaneho sa hangaring maiahon ang trak sa gilid ng kalsada ngunit hindi nagtagumpay ang gusto niyang mangyari.
“Malalim pala ang pagkakabalaho ng gulong sa putik kaya hindi
makaahon,” wika ng nagmamaneho. “Kamalas naman, ibababa pa yata natin ang ating karga!”
“Parang gano’n nga ang mangyayari,” sagot ni Mang Abe. “Walang ibang paraan kung hindi ibaba ang mga kawayan para makaalis ang trak sa pagkakabalaho!”
“Ano bang nangyari at napunta sa gilid ng kalsada ang trak?” Tanong ng isang lalaki.
“May kumiliti ng kumiliti sa talampakan ko kaya napunta ang trak dito sa maputik na gilid ng kalsada. At ang nakakapagtaka, wala akong nakitang kumikiliti sa akin,” paliwanag ng nagmamaneho.
“Baka kiniliti ka ng mga tambulislis,” wika ng isa pang lalaki. “Ginantihan tayo sa pagputol natin sa mga kawayan na ayon sa dalawang batang lalaki, tirahan ng mga nilikhang ‘yun!”
“Hindi malayong gano’n ang nangyari,” sagot ng nagmamaneho. “Damang-dama kong may kumiliti ng kumiliti sa talampakan kong hindi ko nakikita, kaya nalihis ng direksyon ang trak!”
“Kung totoo ang sinasabi mo, talagang kagagawan ng tambulislis ang nangyari,” sagot ni Mang Abe. “At sa nangyaring ito, wala na tayong magagawa kung hindi ibaba ang mga kawayan para makaalis ang trak sa pagkakabalaho!” Itutuloy...