PROTEKSIYON, IMMUNITY INAYAWAN
Pagpapalaya kay Solano, iniutos ng DOJ
Released. Ito ang nakasaad sa resolusyon na inilabas kahapon ng Department of Justice (DoJ) kaugnay ng inihaing reklamo ng Manila Police District laban kay John Paul Solano na itinuturing na isa sa mga pangunahing suspek sa pagpatay kay Horacio “Atio” Castillo III.
Sa limang pahinang resolusyon na nilagdaan ni Asst. State Prosecutor Susan Villabueva, iniutos ang masusing imbestigasyon at itinakda ang preliminary probe sa kaso sa Oktubre 4-9.
Ito ay nangangahulugan ng pansamantalang paglaya ni Solano.
Samantala, tinanggihan ng kampo ni Solano ang posibilidad na ilagay siya sa Witness Protection Program (WPP) ng DoJ.
Ayon kay Atty. Paterno Esmaquel, abogado ni Solano, hindi rin nila tinanggap ang alok na legislative immunity para sa kanyang kliyente.
Paliwanag ni Esmaquel, hindi niya nakikitang kailangan ni Solano ng proteksiyon mula sa gobyerno.
Handa umano si Solano na ihayag ang lahat ng kanyang nalalaman kaugnay ng pagkamatay ni Castillo kahit walang anumang immunity. ‘DI TAKOT BALIKAN NG MGA IKINANTA Hindi takot si Solano na balikan siya ng mga kasamahan sa fraternity sakaling kunin siya bilang state witness sa kaso.
Sa panayam mula sa kanyang selda sa Manila Police District-Crimes Against Persons Investigation Section (MPDCAPIS), sinabi ni Solano na naniniwala siyang hindi “barbaric” at “savage” ang utak ng kanyang mga kapatid sa Aegis Juris Fraternity para balikan at patayin siya ng mga ito.
"Sa ngayon po, hindi na kasi nasabi ko na naman po doon kung sino iyong mga 'yon. If ever -- huwag naman sana -- na mawala ako, may nakakaalam na rin pong iba, more or less iyong senators po," ani Solano.
"That would be good pero para sa akin, hindi naman ganoon ka-savage or barbaric ang utak ng mga brods ko to kill me for that reason," aniya pa.