Utak fraternity
NAKAGIGIMBAL ang ibinunyag na estadistika ng isang senador sa mahigit isandaang kasong isinampa ng Philippine National Police (PNP) laban sa iba’t ibang fraternity na dawit sa hazing at sa pagkasawi ng mga “neophyte” sa nagdaang panahon.
Mas nakalulungkot ang realidad na bilang lang sa isang kamay ang pamilyang nadantayan ng hustisya sa mala-Hudas na pagkamatay ng kanilang anak.
Dahil dito, nagugunita ko noong kabataan ko nang mabigwasan ng tinaguriang “initiation”. Nakatanggap ako ng kulang-kulang 35 suntok. Dahil sa malapit ako sa aking magulang at bukas ang aming hapag-kainan sa pondahan, ipinagtapat ko ang pagsapi, pati na ang mga suntok na tiniis ko.
Tahimik na nakinig ang aking ama at nang matapos ang aking kuwento, malumanay na nagtanong ang aking mga magulang, “Kapag tinutukso ka ng kapatid mo, hindi ba kadalasan hindi ka rin nagpapatalo sa talastasan?
Hindi ba kung inaaway ka ng kapatid mo o sinasaktan, ano ba ang ginagawa mo? ‘Di ba hindi ka rin nagpapatalo sa bigayan? Anak, bakit ka pumapayag na sapukin at nagpagulpi sa taong hindi mo kaanuano? Hindi mo kadugo?”
Wala akong masagot. “Natatandaan mo noong una ka pa lang umapak sa paaralan?” tanong ng ama ko. “Ano ang una kong pabaong payo sa iyo? ‘Wag kang manlalamang sa kapwa. Hindi tama na ikaw ang magsisimula ng gulo. Pero, huwag ka rin pumayag na maagrabyado. Nagkataong binuntal ka, sapukin mo rin. Gusto ni Kristo ang hindi nagpapaapi sa mga basagulero.”
Inihanda ako ng aking mga magulang sakaling magkaroon ng “bullying” sa pasukan. May mga hakbang sa ating kamus- musan sa pag-iisip at karanasan na dapat isangguni sa ama at sa ina. Sino nga...
naman ang mas pagkakatiwalaan mo sa tamang daan – sariling magulang o “frat”?
Kaya nang maging pangulo ako ng San Beda Student Council, at nagkaroon ng “rambolan” at bali-balitang initiation sa “kapatiran”, iminungkahi ko na payagan ang ganitong mga samahan na lumantad at magparehistro bilang kinikilalang ugnayan ng mag-aaral sa aming kolehiyo.
Hayag ang listahan ng mga kasapi at aplikante. May alumni fraternity adviser, opisina/ cubicle sila at hayag idikit/ iwagayway ang mga bandila nila sa campus. Habang ang utak fraternity at gang, bawal! ‘Pag ganyan, sipa agad lahat, hanggat maaga.