Cross exam sa sariling impeachment, giit ni Sereno

Hiniling ni Supreme Court Chief Justice Maria Lourdes Sereno, sa pamamagitan ng kanyang mga abogado, sa House Committee on Justice na bigyan siya ng karapatan na personal na komprontahin at i-cross-exam ang mga saksi sa kasong impeachment laban sa kanya.

Nagsumite si Sereno ng liham sa Kamara na naggigiit sa kanyang karapatan na ma-cross-examine ang mga kalabang testigo, sa ilalim ng Section 6 ng House Rules on Impeachment

Sinabi ng punong mahistrado sa kanyang liham na hindi lang basta resource persons ang mga taong ipiprisinta laban sa kanya kundi mga testigo na puwede niyang i-cross-exam at maging ng kanyang legal team.

Ang impeachment complaint laban sa CJ ay inihain ng abogadong si Larry Gadon. Sinabi nito na ang isang respondent “is always given the opportunity to examine witnesses” ngunit hindi siya sigurado kung inoobserba rin ito sa impeachment proceedings.

Sinabi ng Committee on Justice ng House of Representatives na maaari namang ma-cross examine ni Sereno ang mga saksi sa impeachment case laban sa kanya.

Gayunman, nilinaw ni Mindoro Oriental Rep. Reynaldo Umali, chairman ng House Committee on Justice, na limitado ang cross-examination na maisasagawa ni Sereno.

Sa panayam ng media, sinabi ni Umali na habang ang mga isyung idinudulog ng lahat ng partido kaugnay sa proceeding sa pagtukoy ng probable cause ay maaaring pagbotohan ng committee, malinaw ang mga patakaran sa lahat ng pagdinig na isinasagawa ng Senado at ng Mababang Kapulungan.

Sinabi ni Umali na ang mga abogadong kumakatawan sa mga inimbitahang resource persons, o sa kasong ito ang respondent at complainant sa isang impeachment complaint, ay hindi pinapayagan na komprontahin o direktang magbato ng katanungan sa mga saksi.

“We do not allow lawyers to speak. But parites are not deprived their right to cross-examine witnesses, except that they must do it personally through congressmen,” sinabi ni Umali.

“They (Sereno lawyers) can find an ally (in the committee) who may support their cause and then articulate whatever cross examination questions they want to throw to the witness,” dagdag ng opisyal ng Kamara.

Sinuportahan ni Albay Rep. Edcel Lagman, dating chairman ng House justice panel, ang posisyon ni Sereno na aniya ay “in order and consistent with the Constitution on the rights of the accused.”