6,000 Saudi OFWs dapat kumuha ng amnesty

Umapela ang gobyerno sa natitirang 6,000 Pilipino na may irregular status sa Kingdom of Saudi Arabia (KSA) na samantalahin na ang panibagong extended amnesty program ng bansang Arab.

Binanggit ang ulat ng Philippine Embassy sa KSA, sinabi ng Philippine Overseas Employment Administration ( POEA) na mayroon na lamang hanggang Oktubre 15, 2017 ang mga kwalipikadong Pinoy para mag-apply sa provisional extension ng amnestiya.

Sakop ng amnesty program ang mga sumusunod na migrants categories: may hawak ng expired na umrah, hajj visit visa; pilgrim na walang hajj permit; mga tumawid sa kaharian nang walang permit; residents na pumaso na ang resident ID card (Iqama); manggagawa na may work permit ngunit walang Iqama; manggagawa na idineklarang absconding ( huroob) ng kanilang employers/sponsors.

Ang mga kwalipikadong Pinoy ay maaaring magsumite ng amnesty application sa Saudi Immigration (Jawasat).

“The Jawasat Processing Center in Riyadh is located at 7516 Zaid IbnThabit Al Malaz, Riyadh. The Center is open from 7:30 am to 2 pm only,” saad sa pahayag ng POEA.

Nagbabala ang POEA sa irregular OFWs, na hindi makakapag-apply sa programa bago ang deadline, na mahaharap sila sa pag- aresto, pagkakulong, at magbabayad ng multa sa Saudi government.

Ito na ang ikalawang pagkakataon na pinalawig ng gobyerno ng Saudi ang amnesty program nito, na nagsimula noong Marso 2017 at nakatakda sanang magtapos nitong Mayo.