Pinalawig na kapalpakan

SA biglang tingin, ang pagsasabatas ng bill na nagpapaliban sa halalan ng mga Barangay at Sangguniang Kabataan (SK) ay maituturing na pagpapalawig ng palpak na panunungkulan ng mga tiwaling opisyal. Nangangahulugan na ang naturang mga halal na lingkod- bayan ay patuloy pang makapamamayagpag sa kabila ng katotohanan na sila ay matagal nang isinusuka, wika nga, ng kanilang mga nasasakupan. Matagal na sila dapat nawala sa puwesto dangan nga lamang at nagkasunudsunod ang pagpapaliban ng barangay polls.

Sa panukalang-batas na sinasabing tiyak na lalagdaan ni Pangulong Duterte, itinatadhana na ang nabang- git na halalan ay muling itinakda sa Mayo 2018. Walang naging balakid sa pagsusulong ng nasabing panukala. Katunayan, nagkasundo ang mga Senador at Kongresista na pag-isahin na lamang ang kanilang mga bersiyon at hindi na kailangang magkaroon ng bicameral meeting; kaagad itong ipadadala sa Malacañang, tulad ng napagkasunduan sa pagpupulong kamakailan ng Legislative and Executive Development Advisory Council (LEDAC).

Dahil dito, ang kasalukuyang pamunuan ng mga barangay ay makapagpapatuloy ng panunungkulan bilang mga hold- over officials. Tulad ng inaasahan, ang mga palpak na lider ay patuloy na makapagsasamantala sa tungkulin; ipagpapatuloy ang kanilang masasamang gawain tulad ng pakikipagsabwatan sa mga kriminal at sa mga sugapa sa ipinagbabawal na gamot.

Subalit malakas ang aking kutob na ang pagpapaliban ng nasabing halalan ay sinadya ng administrasyon upang maglunsad ng puspusang pagkilatis sa mga barangay officials na nagiging balakid sa paglikha ng malinis na gobyerno. Determinado ang Pangulo na lipulin ang mga katiwalian sa lahat ng sangay ng pamahalaan, lalo na nga sa mga barangay na talamak sa ipinagbabawal na droga. Halos 92 porsiyento ng ating mga barangay ay lugmok sa illegal drugs.

Naiiba naman ang paninindigan ng ilang lider ng local government units (LGUs). Si Gob. Czarina Umali ng Nueva Ecija, halimbawa, ay naniniwala na ang pagpapaliban ng barangay polls ay isang makabuluhang pagkakataon upang maipagpatuloy ang matinong pamamahala ng nasabing mga opisyal. Sa pamamagitan ng kanyang tagapagsalita, ipinahiwatig ng aming gobernador na ang maayos na panunungkulan ng mga barangay leaders ang magiging barometro sa susunod na eleksiyon.

Ganito rin ang paninindigan ng Liga ng mga Barangay Council na pinamumunuan ni Atty. Edmond Abesamis. Ang nabanggit na pagpapaliban ng halalan ay kaakibat ng simulaing demokratiko na nakaangkla sa Konstitusyon. Karapatan ng administrasyon na tiyakin ang maayos na implementasyon ng mga sistemang pampulitika sa kapakanan ng sambayanan.

Taliwas ito sa paniniwala ng mga barangay officials na walang adhikain kundi lumawig ang kanilang palpak na pamamahala.