Pagpupugay sa mga bayani ng silid-aralan

SA iniibig nating Pilipinas, ang Setyembre 5 hanggang Oktubre 5 ay National Teachers’ Month o Pambansang Buwan ng mga Guro. Ang pagdiriwang ay batay sa Proclamation No. 242 na nilagdaan ni dating Pangulong Noynoy Aquino bilang pagkilala sa malaking kontribusyon ng mga guro sa magandang kinabukasan ng mga mag- aaral. Ang Oktubre 5, na huling araw ng Pambansang Buwan ng mga Guro, ay pagdiriwang naman ng “World Teachers’ Day” o Pandaigdigang Araw ng mga Guro na itinuturing na mga bayani ng silidaralan.

Ang “World Teachers’ Day” ay inilunsad ng United Nations Educational Scientific and Cultural Organization ( UNESCO) noong 1993. Ang ika-5 ng Oktubre ay ang araw na inilaan upang ipagdiwang ang propesyon ng mga guro at ang kanilang gawain sa pagsubaybay sa mga kabataan sa pagtahak sa proseso ng habambuhay na pagkatuto. Ipinagdiwang ang unang “World Teachers’ Day” noong Oktubre 5, 1994 bilang paggunita sa paglagda noong Oktubre 5, 1966 ng UNESCO, International Labor Organization (ILO) na nagsasaad ng mga rekomendasyon sa kalagayan ng mga guro.

Hinimok ng UNESCO ang mga mag-aaral, pamahalaan at ang mga pribadong samahan na magsagawa ng mga gawaing magpapakita ng pagpapahalaga sa mga kontribusyon ng mga guro sa edukasyon at pambansang kaunlaran. Layunin din ng pagdiriwang na paigtingin ang paggalang sa pagtuturo bilang isang bokasyon at pagkakaloob sa mga guro ng mga kinakailangang suporta.

Sa mga pampublikong at pribado paaralan sa iba’t ibang bayan sa lalawigan, mula noong Setyembre hanggang bago sumapit ang ika-5 ng Oktubre, ay may mga programang inilunsad bilang pagpapahalaga at parangal sa mga guro na itinuturing na pangalawang magulang ng mga mag-aaral sa loob ng silid-aralan.

Ngayong ika-2 ng Oktubre, sa lalawigan ng Rizal, gagawin ng DepEd Rizal ang sabay na pagdiriwang ng National Teachers’ Month at ng World Teachers’ Day. Ito ay pangungunahan ni Dr. Marites Ibanez, DepEd Rizal Division Superintendent. Gaganapin sa Ynares sa Antipolo at tampok na mga panauhing tagapagsalita sina Rizal Gov. Nini Ynares at Representative Michael Jack Duavit, ng Unang Distrito ng Rizal.

Ang inyong lingkod ay isang retired teacher sa Redemptorist Seminary at sa La Salle Greenhills. Sa aking paniniwala, walang kayamanan sa pagtuturo. Ang maituturing na yaman ng mga guro...

ay ang makita at mabatid na ang kanyang mga naging estudyante ay nagtagumpay sa pag-aaral at sa kanilang propesyon. Mababanggit kong halimbawa sina Ogie Alcasid, Gary Valenciano, Randy Santiago, Senador Ralph Recto, Senador Kiko Pangilinan, Representative Ace Barbers, dating Rep. Joel Duavit, ng Unang Distrito ng Rizal, Taytay, Rizal Mayor Juric Gacula, at dating Party List Rep. Teddy Casino. May naging matagumpay din mga doktor.

May nagsasabi na kung ang mga arkitekto ay nakapagdidisenyo ng mga gusali, ang mga guro naman ay humuhubog ng mga pangarap. Ang mga inhinyero ay nakapagtatayo ng mga gusali at mansiyon, ang mga guro naman ay nagtatayo ng kinabukasan. Tatanda at magbabalik sa kanyang Manlilikha ang mga guro, ngunit ang mga itinuro niya sa buhay ay buhay magpakailanman.