Ex 23:20-23 ● Slm 91 ● Mt 18:1-5, 10
Lumapit kay Jesus ang mga alagad at tinanong nila siya: “Sino ang mas una sa Kaharian ng Langit?”
Tinawag ni Jesus ang isang maliit na bata at ipinagitna sa kanila, at sinabi: “Sinasabi ko sa inyo: hanggang hindi kayo nagbabago at nagiging tulad ng maliliit na bata hindi kayo makapapasok sa Kaharian ng Langit. Ang nagpapakababa gaya ng maliit na batang ito, siya ang pinakamalaki sa Kaharian ng Langit. At tinatanggap naman ako ng sinumang tatanggap sa batang ito nang dahil sa aking pangalan.
“Huwag sana n’yong hamakin ang isa sa maliliit na ito; talagang sinasabi ko sa inyo na laging nasa harap ng aking Ama sa Langit ang kanilang mga anghel sa Langit.”
PAGSASADIWA:
Sinasabi ko sa inyo: hanggang hindi kayo nagbabago at nagiging tulad ng maliliit na bata, hindi kayo makapapasok sa Kaharian ng Langit.— Hindi maitatanggi na sadyang malapit ang kalooban ni Jesus sa mga maliliit at mahihina na siyang sinasagisag ng mga bata. Malimit ding maihambing ang Kaharian ng Diyos sa mga bagay na maliliit katulad ng binhi, butil ng mustasa o kaya ay masa ng harina na may lebadura.
Sa paglalarawang ito na ginagamit ni Jesus upang ihambing ang Kaharian ng Diyos, nais ng Panginoon na imulat tayo sa katotohanang ang mga mapagmalaki ay walang puwang sa Kaharian ng Langit. Ang Kaharian ng Diyos ay isang lugar o karanasang nakalaan para sa mga taong tumatanggap ng kanilang pagiging “bata” o maliit sa harapan ng Diyos. Ang pagiging bata sa paningin ng Diyos ay isa ring hamon o tawag sa pagkakaroon ng isang malinis na kalooban. Sa pagiging “bata” at pagkakaroon ng malinis na kalooban, mas madali nating makikita ang kadakilaan ng Diyos.