Danley balik-US para sa Vegas shooting probe
LOS ANGELES/ MANILA ( Reuters, AP) – Dumating na sa Los Angeles mula sa Pilipinas ang girlfriend ng gunman na pumatay ng 59 katao at pagkatapos ay nagpakamatay din sa Las Vegas. Umaasa ang FBI agents na matanong siya kaugnay sa masaker, sinabi ng mga awtoridad.
Si Marilou Danley, inilarawan ng U. S. authorities na “person of interest” sa imbestigasyon, ay umalis ng Manila noong Martes ng gabi sakay ng Philippine Airlines Flight PR 102, ayon kay Bureau of Immigration spokeswoman Antonette Mangrobang.
Lumapag ang non-stop flight sa Los Angeles International Airport (LAX), 7:30 ng gabi ng Martes (2:30 ng hapon ng Miyerkules sa Pilipinas), ayon sa airline tracking website na FlightAware.com at mga pasahero mula sa flight.
Sinabi ni Mangrobang sa text message sa Reuters na walang impormasyon kung may kasama sa biyahe si Danley.
Sinabi ng isang opisyal ng Philippine National Police (PNP) at ng isang law enforcement official sa United States, kapwa hindi nagpabanggit ng pangalan, na walang kasamang umalis ng Pilipinas si Danley ngunit sinalubong siya ng Federal Bureau of Investigation (FBI) agents sa Los Angeles.
Sinabi ng U.S. source na hindi inaaresto si Danley ngunit umaasa ang FBI na makikipagtulungan siya sa imbestigasyon.
Ayon sa PNP official, ang biyahe ni Danley pabalik sa United States “was coordinated with FBI authorities” at babalik ito para linisin ang kanyang pangalan.
Pinatay ni Stephen Paddock ang 59 katao at mahigit 500 iba pa ang nasugatan nitong Linggo ng gabi sa nang paulanan niya ng bala ang mga taong nagtipon sa Route 91 Harvest country music festival mula sa 32nd floor suite ng Mandalay Bay hotel sa Las Vegas Strip.
Walang iniwang pahiwatig si Paddock, ang kanyang live- in companion na nagpakamatay bago pa makapasok ang mga pulis sa silid nito sa Mandalay Bay Hotel and Casino na ginawa niyang sniper’s nest noong Linggo ng gabi, kung bakit niya ginawa ang krimen. $100,000 WIRE TRANSFER
Umaasa ang mga awtoridad na makakuha ng mga kasagutan kay Danley, na ayon sa public records at sa pulisya ay kasama ni Paddock sa condo sa isang retirement community sa Mesquite, Nevada, may 145 kilometro ang layo mula sa hilagang silangan ng Las Vegas.
“We anticipate some information from her shortly,” sabi ni Clark County Sheriff Joseph Lombardo.
Sinabi ng PNP official na inimpormahan sila na ginamit ni Paddock ang identification ni Danley, may hawak ng Australian passport, nang mag-check in ito sa Mandalay Bay Hotel and Casino sa Las Vegas.
Iniimbestigahan din ng mga awtoridad ang $100,000 wire transfer na ipinadala ni Paddock sa isang account sa Pilipinas na lumalabas na para kay Danley, sinabi ng isang mataas na U.S. homeland security official kahapon.
Nais malaman ng mga opisyal ng U.S. mula kay Danley, inilarawan ang sarili sa social media na websites na isang “casino professional” ina, at lola, kung hinikayat siya ni Paddock na umalis ng United States bago nito isagawa ang mass shooting.
Dumating si Danley sa Manila noong Setyembre 15, mahigit dalawang linggo bago ang mass shooting sa Las Vegas, at pagkatapos ay lumipad sa Hong Kong noong Setyembre 22 at nagbalik sa Manila noong Setyemnbre 25. Nanatili siya sa Manila hanggang sa lumipad patungong LAX nitong Martes ng gabi, ayon sa isang opisyal ng Philippine immigration.
Si Danley, 62 anyos, isang Australian na iniulat na isinilang sa Pilipinas, ay hindi namataan ng mga mamamahayag sa LAX arrival terminal.
Iniulat ng New York Times na si Danley ay mayroong anak na babae na naninirahan sa Los Angeles.