Nagpakita ng ari sa 13-anyos, kalaboso
Sa rehas ang bagsak ng isang lalaki matapos nitong pakitaan ng ari ang 13-anyos na dalagita na umano’y nililigawan nito makaraang tanggihan ang kanyang “indecent proposal”, sa isang pampublikong palikuran sa Tondo, Maynila kamakalawa.
Mismong ama ng biktima ang umaresto at nagdala sa presinto kay Arnel Baldestoy, 47, binata, kargador, ng 649 Baseco Street, sa Tondo, nang malaman ang kabastusang ginawa nito sa biktima.
Sa ulat ni PO3 Jennifer Cadatal na ipinarating sa tanggapan ni Police Supt. Santiago Pascual III, station commander ng Manila Police District (MPD)-Station 2, naganap ang insidente sa tapat ng banyo sa Plaza Morga, na matatagpuan sa J. Nolasco St., kanto ng Sta. Maria St., sa Tondo, bandang 5:50 ng hapon.
Naglalaba ng mga damit ang biktima nang lapitan ni Baldestoy at sabihan ng indecent proposal.
Nang tumanggi umano ang dalagita, pumasok si Baldestoy sa banyo at naghubad ng brief bago lumabas at ipinakita ang kanyang ari sa biktima.
Sa takot ng dalagita ay agad umano nitong pinagtuunan ng pansin ang kanyang nilalabhan kaya napilitan ang suspek na muling pumasok sa banyo at isara ang pinto.
Isa sa mga kaibigan ng biktima ang nakasaksi sa ginawa ni Baldestoy at nagsumbong sa ama ng dalagita.
Dali-daling sinugod ng ama ng biktima ang suspek at saka idiniretso sa presinto upang ipakulong at sampahan ng kaukulang kaso.