107 tiklo sa anti- criminality ops
Nasa 107 katao, na pawang nahaharap sa paglabag sa batas, ang inaresto sa serye ng anti-criminality operation ng Eastern Police District (EPD) sa kanilang nasasakupan kamakalawa.
Sa ulat ng EPD, unang inaresto sina Rodelio Tampoco at Marlon Bodano, ng Mandaluyong City; Majill Ganal, Noel Ocapan, Narciso Engua, Ronulfo Aguinaldo at John Romer Vasquez, ng Pasig City, dahil sa paglabag sa Republic Act 9165 o Comprehensive Dangerous Drugs Act of 2002.
Sina Tampoco at Bodano ay nadakip ng mga elemento ng Bantay Bayan sa Block 39, Barangay Addition Hills, Mandaluyong City, dakong 1:30 ng madaling araw.
Nakatanggap ng tawag ang awtoridad hinggil sa nagaganap na transaksiyon sa ilegal na droga kaya rumesponde ang mga pulis at dinakip ang mga suspek na nakumpiskahan ng limang pakete ng umano’y shabu at mga drug paraphernalia.
Dinampot naman ng mga tauhan ng Pasig City Police-Station Drug Enforcement Unit sina Ganal at Ocapan sa buy-bust operation sa Afable Street, sa Sagad, Pasig City, dakong 6:30 ng gabi.
Nakumpiska sa kanila ang pitong pakete ng umano’y shabu at P200 buy-bust money.
Sa nasabi ring oras inaresto si Vasquez sa buy-bust operation sa N. Balderama St., sa Bambang, at nakuha mula sa kanya ang siyam na pakete ng umano’y shabu at P200 marked money.
Pagsapit ng 8:00 ng gabi, hinuli ng mga tauhan ng SDEU sina Engua at Aguinaldo sa buy-bust operation sa Asuncion St., Sagad, at nakumpiskahan ng limang pakete ng umano’y shabu at P300 buy-bust money.
Samantala, pagsapit ng 10:00 ng gabi hanggang 12:00 ng hatinggabi kamakalawa ay nagsagawa ng serye ng operasyon ang mga tauhan ng EPD-Anti-Criminality Law Enforcement Operation at naaresto ang 100 indibiduwal na pawang lumabag sa batas.
Kabilang sa mga nalambat ang 18 katao na nag-iinuman sa pampublikong lugar, limang lumabag sa anti-smoking law, 27 ang nakahubad baro, isang natutulog sa pampublikong lugar, 48 ang lumabag sa batas-trapiko, at isa ang sinilbihan ng warrant of arrest.