Dos, nangunguna pa rin sa ratings game
ABS-CBN pa rin ang pinakatinutukang network pagdating sa paghahatid ng balita at mga palabas na puno ng aral noong Setyembre sa nairehistrong average audience share na 47% o 14 na puntos na mas mataas kumpara sa 33% ng GMA, ayon sa television viewership survey data ng Kantar Media.
Ang Kapamilya Network ang pinakapinanood sa iba’t ibang panig ng bansa. Nanguna ang ABS-CBN sa Metro Manila inani nitong average audience share na 42%, kumpara sa 28% ng GMA; sa Total Luzon sa naitalang 43% at tinalo ang GMA na may 36%; sa Total Visayas na nakapagrehistro ito ng 54% kumpara sa 27% ng GMA; at sa Total Mindanao na nagkamit ito ng 54% laban sa 30% ng GMA.
Nanguna pa rin sa listahan ang FPJ’s Ang Probinsyano (40.2%) sa selebrasyon ng ikalawa nitong anibersaryo at patuloy na pinasasabik ang mga manonood sa misyon ni Cardo ( Coco Martin) sa pagsagip ng kanyang kapwa SAF members.
Hindi rin nagpahuli ang serye ng KathNiel na La Luna
Sangre (35.2%) na lalong pinag-usapan nang magbalik si Angel Locsin at ipinakilala bilang Jacintha Magsaysay. Nanatiling pinakapinanood ang TV Patrol (33.8%) kumpara sa katapat nitong 24 Oras (20.9%). Tinutukan din ang Little
Big Shots (33.3%) na kinagiliwan dahil sa natatanging talento ng kabataan at mga kuwento ng buhay ng mga ito na pumukaw sa puso ng mga manonood.
Patuloy ring nagbibigay ng inspirasyon ang mga kuwento sa MMK 25 (30.1%) at ang katatapos na Wansapantaym Presents:
Amazing Ving (27.8%). Patindi rin nang patindi ang mga rebelasyon sa Wildflower (25.3%) at nanatiling namamayagpag sa timeslot nito.
Kasama rin sa top 10 ang Kapamilya comedy shows na Home Sweetie Home (23.7%) nina John Lloyd Cruz at Toni Gonzaga at ang Goin’ Bulilit (21.2%).
Inabangan din ang ABS-CBN sa lahat ng time blocks noong Setyembre, partikular na sa primetime (6PM-12MN), AT nakakuha ito ng average national audience share na 51%, 20 na puntos ang lamang sa 31% ng GMA. Naghari rin ang Kapamilya Network sa morning block (6AM-12NN) at nagtala ng 40% laban sa 31% ng GMA; sa noontime block (12NN3PM) matapos nitong magkamit ng 47% kumpara sa 35% ng GMA; at sa afternoon block (3PM-6PM) at nagkamit ng 43% laban sa 39% ng GMA.