MABUTING BALITA

Jon 1:1—2:1-2, 11 ● Jon 2 ● Lc 10:25-37

May tumindig na isang guro ng Batas para subukin si Jesus. Sinabi niya: “Guro, ano ang gagawin ko para makamit ang buhay na walang hanggan?” Sumagot sa kanya si Jesus: “Ano ba ang nasusulat sa Batas, at paano mo ito naiintindihan?” Sumagot ang guro ng Batas: “‘Mamahalin mo ang Panginoon mong Diyos nang buo mong puso at nang buo mong kaluluwa at nang buo mong lakas at nang buo mong pag-iisip.’ At nasusulat din naman: ‘Mamahalin mo ang iyong kapwa gaya ng iyong sarili.’ ”

Noo’y sinabi ni Jesus sa kanya: “Tama ang sagot mo. Gawin mo ito at mabubuhay ka.” Pero gustong mangatwiran ng guro ng Batas kaya sinabi niya kay Jesus: “At sino naman ang aking kapwa?” Sinagot siya ni Jesus: “May isang taong bumaba mula sa Jerusalem papunta sa Jerico at nahulog siya sa kamay ng mga tulisan. … binugbog at saka iniwang halos patay na. Nagkataon namang may isang paring pababa rin sa daang iyon. … Gayundin naman, may isang Levitang napadaan sa lugar na iyon; nang makita siya’y lumihis din ito ng daan.

“Pero may isang Samaritano namang naglalakbay na napadaan… pagkakita nito sa kanya, naawa ito sa kanya. … Isinakay nito ang tao sa sarili niyang hayop at dinala sa isang bahay-panuluyan at inalagaan.

PAGSASADIWA:

Guro, ano ang gagawin ko para makamit ang buhay na walang hanggan?— Nananatiling sukatan ng kaligtasan ang pag-ibig sa Diyos at pag-ibig sa kapwa gaya ng ating sarili. Hindi maaaring paghiwalayin ang pagmamahal sa Diyos at pagmamahal sa ating kapwa. Hinihingi ng tunay na pagmamahal sa Diyos ang pagsasagawa nito sa pamamagitan ng konkretong pagpapadama ng awa at habag sa ating kapwa maging ano man ang kanyang kulay, kasarian, relihiyon, o katayuan sa buhay. Madali sanang magmahal kung ang mamahalin lamang natin ay ang mga taong nagmamahal din sa atin katulad ng ating mga mahal sa buhay, mga kaibigan, o pinagkakautangan ng loob.