La Salle netters, kampeon sa UAAP
PARA kay Ian ‘ Yan- Yan’ Lariba.
Sa ganitong mensahe ipinadama ng La Salle ang marubdob na hangarin na maitala ang makasaysayang four-peat sa women’s table tennis ng UAAP.
Ginapi ng Lady Green Paddlers ang University of Santo Tomas para mapanatili ang kampeonato sa Season 80 nitong Lunes sa UP CHK Gym.
Matapos mabigo sa championship opener, 2- 3, na pumutol sa kanilang 14- game winning run, bumalikwas ang Green Paddlers para maipanalo ang huling dalawang laro sa parehong iskor na 3-1 para sa ikaapat na titulo.
Bahagi ang Rio Olympian na si Lariba, kasalukuyang nakaratay sa ospital dahil sa Leukemia, sa huling tatlong kampeonato ng Taft-based paddlers.
Sa men’s division, nakopo ng National University ang kaunaunahang titulo sa table tennis nang gapiin ang UST, 3-1, sa deciding match.
Nakopo ni Emy Rose Dael, pumalit sa iniwang puwesto ni Lariba, ang ikalawang sunod na MVP award, habang naging makahulugan ang pagtatapos ng kanyang teammates na sina Jamaica Sy at Mardeline Carreon.
Nakuha naman si Ateneo’s Joana Chen ang Rookie of the Year honor, habang si John Misal ng Bulldogs ang season MVP sa men’s class.
Nagwagi rin ang NU boy’s team kontra UST, 3-0, para sa double celebration ng Sampaloc- based paddlers.
Napagwagihan naman ng UST girls’ team ang korona kontra La Salle, 3-1.