Andanar sa Tindig: Napapirma n’yo ba si PNoy?

Inakusahan ng Malacañang ang grupo ng oposisyon ng pagkakaroon ng “double standard” nang igiit ng mga ito na pumirma si Pangulong Duterte sa isang waiver upang mabusisi ang mga bank account nito.

Sinabi ni Presidential Communications Secretary Martin Andanar na bagamat iginigiit ng Tindig Pilipinas ang paglagda ng Presidente sa bank waiver, bigo naman ang mga miyembro nito na kumbinsihin si dating Pangulong Benigno S. Aquino III na isapubliko ang bank records nito ilang taon na ang nakalilipas.

“Napapirma n’yo ba si Pangulong Noynoy Aquino noon, noong siya ay sinabihang mag-waiver ng bank account? Hindi n’yo naman pinapirma,” sinabi ni Andanar ng kapanayamin sa radyo.

“Anong tawag d’yan? Ngayon, sisigaw kayo pipirma-pirma. Ang tawag ko d’yan ‘double standard’,” dagdag niya.

Naglunsad kamakailan ang Tindig Pilipinas, koalisyon ng mga grupong kumokondena sa umano’y extrajudicial killings (EJKs) at iba pang mga pag-abuso ng administrasyong Duterte, ng petisyon na humihiling kay Pangulong Duterte na pumirma ng bank secrecy waiver upang tuluyan nang mapabulaanan ang isyu sa umano’y tagong yaman nito. Kabilang sa grupo ang mga kaalyado ng Liberal Party, ang partido pulitikal ni Aquino.

Sa presidential campaign noong 2010, napaulat na sinabi ni Aquino na handa siyang buksan ang kanyang bank accounts sakali man na may kumukuwestiyon sa kanyang integridad.

Subalit nang maluklok na sa puwesto, idineklara ni Aquino na hindi siya pipirma sa waiver, at sinabing maaari namang busisiin ang kanyang mga ari- arian batay sa Statement of Asset, Liabilities and Net Worth (SALN) na isinumite niya sa Office of the Ombudsman.

Kasalukuyang iniimbestigahan si Duterte ng Office of the Ombudsman sa umano’y pag-iingat ng bilyun-bilyong piso sa mga sekretong bank account, batay sa reklamo ni Senator Antonio Trillanes IV.

Samantala, iginiit ni Andanar na si Trillanes na ang bahalang patunayan ang alegasyon nito ng nakaw na yaman laban kay Duterte.

“Si Senator Trillanes naman ang nagsabi na meron dalawang milyon, etcetera. Siya ang nagsabi so the burden is with Senator Trillanes to prove ‘yung kanyang sinasabi,” ani Andanar.

Bukod dito, sinabi ni Andanaw na ang bank waiver na inisyu ng Pangulo noong Mayo ay “still effective today”, base sa pahayag ni Chief Presidential Legal Counsel Salvador Panelo.