‘Alay Para sa Atleta ng Philspada

INILUNSAD kahapon sa isang simpleng pagtitipon na ginanap sa Dad’s Kamayan EDSA kahapon ang proyektong “Alay Para Atleta” na may pangunahing layunin na mapalaganap sa buong bansa ang Paralympic Movement at makakalap ng karagdagang pondo na makakatulong sa kampanya ng mga differently abled athletes ng bansa sa iba’t- ibang international competitions at mas mapalawak ang grassroots program ng Philippine Paralympic Committee-Philspada .

“Alay Para Atleta Program is an integrated marketing program which aims to propagate the Paralympic Movement in the country,” pahayag ni PPC-PHILSPADA president Michael Barredo.

Layunin din nito na makalikom ng mas maraming resources na gagamiting ayuda sa Paralympic Movement .

Sa pakikipagtulungan ng kanilang katuwang na G-GATEWAY Mobile Philippines at UAAM gayundin ng Philippine Sports Commission, nilagdaan nina Barredo at G-Gateway Mbile Philippines Senior Director Charlene Reyes ang kontrata nila bilang magkatuwang sa Alay Para Atleta Mobile Donation Project.

Sa ilalim ng nasabing programa na inaasahang magpapakilala at magpapaabot ng kaalaman sa sambayanang Filipino ng pagkakaroon natin ng mga differently-ables athletes na gaya ng mga regular na national athletes ay lumalaban din at inilalaan ang natatanging talent nila para makapagbigay ng karangalan sa bansa.

Kahit sinong Filipino, ay maaaring makapagbigay ng kanilang donasyon o tulong sa pamamagitan ng paggamit ng kanilang cellular phone . Maaaring makapagbigay ng donasyon ang kahit na sino sa pamamagitan ng pagti-text ng keyword na ALAYPARA kasunod kung magkano ang ibibigay na donasyon, halibawa, ALAYPARA50 at i-send o ipadala sa 3456 sa Globe at Smart network.

Umaasa si Barredo na dahil sa magandang performance na ipinakita ng mga Filipino PWD athletes sa nakaraang 9th ASEAN Para Games na ginanap sa Malaysia kung saan humakot sila ng 20 gold medals ay mas marami pa ang maiengganyong sumuporta sa mga ito lalo pa’t nakahanay ang ilang malalaking tournament na kanilang sasalihan kabilang na ang 2020 Tokyo Paralympics, 2018 Indonesia Asian Para Games at ang 2019 Asean Para Games na dito mismo sa bansa idaraos.

Kabilang sa mga dumalo kahapon na nauna nang nagpasinaya sa programa sa pamamagitan ng pagtitext ng kani-kanilang mga donasyon sina UAAP athletes Janjan Jaboneta ng University of the Philippines Fighting Maroons, Hubert Cani ng National Unibversity Bulldogs at Rhyan Amsali ng NU Bullpups kasama sina UAAP execuitive director Atty. Rebo Saguisag at Nonong Calanog ng De La Salle.

Dumalo din si dating PBA 4-time MVP Alvin Patrimonio, at nagbigay ng kanyang donasyon sampu ng pangakong susuporta sa magandang adhikain ng programa.

Inaasahang tatagal at mas magiging malawak ang maaabot sampu ng malilikom na suporta ng ALAY Para Atleta program hanggang sa 2020 kung saan target ng PPC-PhILSPADA na makamit ang unang Paralympic gold ng bansa.

“Nagpapasalamat po kami sa lahat ng mga sumusuporta at susuporta sa napakagandang programang ito na napakalaki ng maitutulong para sa mga gaya kong mga atleta na may kapansanan,” pahayag ng weightlifter na si Adeline Dumapong, isa sa pinakamatagumpay na Filipino Paralympian na dumalo sa okasyon.