Kamara, titiyaking pulido ang impeachment case vs Bautista
Tinatrabaho na ng legal team ng House Committee on Justice ang burador ng Articles of Impeachment laban kay Commission on Elections ( Comelec) chairman Andres Bautista.
Sinabi ni Oriental Mindoro Rep. Reynaldo Umali, panel chairman, na target nilang talakayin ang pagbalangkas sa Articles of Impeachment sa susunod na linggo.
Nakatakda sanang magdaos ang kanyang panel ng pagdinig ngayong araw, Oktubre 18, ngunit nagpasyang kanselahin ito dahil sa kakulangan ng quorum. Nasa isang buwang bakasyon na ngayon ang Kongreso at magbabalik ang sesyon sa Nobyembre 13.
“My legal team is working on the articles of impeachment as we speak,” ani Umali sa isang panayam.
“We are resetting the hearing because no members confirmed their presence,” aniya, idinagdag na “[ we] will try next week” na talakayin ang Articles of Impeachment.
Pinanindigan ni Umali na bubuo ang kanyang panel ng pulidong kaso laban kay Bautista upang matiyak ang prosekusyon sa Senate Impeachment Court.
Nitong nakaraang linggo, bumoto ang Mababang Kapulungan pabor sa impeachment ng Comelec chief.
Inaakusahan si Bautista ng betrayal of public trust at culpable violation of the Constitution kaugnay sa mga alegasyon na mayroon siyang P1 bilyon nakaw na yaman, mga iregularidad sa 2016 national elections at kawalan ng kakayanan sa pagtugon sa hacking attack sa Comelec website.
Naghihinala naman si Senador Panfilo Lacson na may usapan si Bautista at ang pamunuan ng Kamara na magbitiw ito para hindi na ma-impeach.
“Yung minadali yung impeachment sa House, overturning even the justice committee recommendation mukhang merong dynamics, mukhang may usapan sila,” ani Lacson.
Itinanggi ito ni Bautista at iginiit na ang kanyang pamilya ang dahilan ng kanyang pagbibitiw.