Lalong maging mapagmatyag

SA kamatayan ng dalawang haligi ng terorismo sa Mindanao – sina Isnilong Hapilon at Omar Maute – nais kong makiisa sa pagpupugay sa kabayanihan ng ating mga sundalo, pulis at iba pang alagad ng batas. Namuhunan sila ng dugo at buhay upang pangalagaan ang seguridad ng sambayanan laban sa paghahasik ng sindak ng mga terorista sa Marawi City.

Dahil dito, masisimulan na kahit paano ang rehabilitasyon ng naturang lungsod na naging eksena ng madugong digmaan ng ating mga sandatahang lakas at ng mga terorista na sinasabing kaalyado ng Islamic State of Iraq and Syria (ISIS). Daan-daan ang namatay sa magkabilang panig, bukod pa sa mga sibilyan na naipit sa malagim na labanan.

Subalit hindi ito dahilan upang maging kampante ang ating mga alagad ng batas. Bagkus, marapat na sila ay lalong maging mapagmatyag sapagkat malaki ang posibilidad na lumantad ang mga bagong lider; hindi malayo na may matatapat at matatapang ding kampon sina Hapilon at Maute na determinado na sumunod sa kanilang mga yapak, wika nga.

Hindi na bago ang ganitong sitwasyon sa grupo ng mga bandido at mga terorista na may kaalyado sa ating mga kalapit na bansa, tulad ng Malaysia, Indonesia at iba pa. Ang Janjalani clan, halimbawa, ay napalit-palitan lamang ng liderato sa kinaaaniban nilang mga terrorist groups. Ganito ang estratehiyang umiiral sa Hapilon at Maute clan.

Sa kabila ng kagitingang ipinamalas ng ating mga kawal at pulis sa paglipol sa mga lider ng mga terorista, naniniwala ako na sisiklab ang puta-putaking karahasan sa iba’t ibang panig ng Mindanao. Ngayon pa lamang ay nagdudumilat na ang mga ulat hinggil sa paghahasik ng sindak ng Abu Sayyaf Group (ASG); kumilos ang kanilang kidnap-for-ransom (KFR) operation. Gayundin ang ilang bandidong Moro National Liberation Front (MNLF) at Moro Islamic Liberation Front (MILF) na nasangkot sa katakut-takot na krimen. Hindi maaaring maliitin ang...

panganib na inihahasik ng Bangsamoro Islamic Freedom Fighters (BIFF). Ang grupong ito ay matatandaang isinasangkot sa nakakikilabot na Maguindanao massacre na ikinamatay ng ating mga bayaning SAF 44. Hindi ba ang masalimuot na trahedyang ito ang sinasabing pinanghimasukan ng nakaraang administrasyon?

Dahil sa posibleng paggitaw ng karahasan kaugnay ng kamatayan nina Hapilon at Maute, lalong tumibay ang aking paniniwala na manatili ang martial law sa Mindanao. Ito ang angkop na sandata laban sa tila walang katapusang paghahasik ng kaguluhan sa panig na iyon ng ating bansa; masundan sana ito ng inaasam nating pangmatagalang kapayapaan o lasting peace.