Hindi dapat na maging mapanisi

ISAsa malapit na kaibigan ng ating Pangulong Rodrigo Duterte na tagaDavao at nasasabing sanggang-dikit at tagapagtaguyod ng mga layunin ng Pangulo na maibigay ang matapat at maayos na paglilingkod sa sambayanang Pilipino ay si House Speaker Pantaleon Alvarez. May mga pagkakataon din na ang ilan sa katangian at asal ng Pangulo ay napapansin ng marami nating kababayan na pinaparisan ng Speaker. Ang pagiging matapang, madaling mainis at mayamot, at may pagkaarogante kapag may hindi nagustuhan sa ginawa ng kanyang mga kasamahan sa Kongreso.

Isang lantay na halimbawa ay ang ginawa ni Speaker Alvarez kay dating Pangulong Gloria Macapagal-Arroyo, na ngayon ay representative ng Pampanga. Tinanggal niya sa pagka-deputy speaker ang dating Pangulo sapagkat kumontra ito sa pagbabalik ng death penalty.

Sa pagpapatalsik kay dating Pangulo at Pampanga Rep. Gloria Macapagal-Arroyo, marami ang naawa at marami rin ang nainis sa inasal ng Speaker. May nagsabi na hindi na nito iginalang ang kalayaan at karapatan ng dating Pangulo sa pagtutol sa death penalty. Bukod sa nabanggit, binalewala ni Speaker Alvarez na siya’y naging Cabinet member ng dating Pangulong Arroyo.

Sa kaugaliang Pilipino, likas at katutubo ang pagkakaroon ng ugali na marunong tumanaw ng utang na loob sa mga taong nakatulong sa kahit anong paraan. Hindi nalilimutan gawin, maliban na lamang kung ang kahihiyan ng isang natulungan ay napunta sa talampakan at binalewala ang nagawang pagtulong. At talagang makapal ang mukha at ingrato, sabi nga sa Kastila.

Kumbaga sa paglalakad, sumubsob ang public satisfaction rating at net trust rating ni Pangulong Rodrigo Duterte, sa survey ng Social Weather Station (SWS). Mula sa pagiging “very good” na 66 plus noong Hunyo ang net satisfaction rating, bumaba o naging “good’ na lamang sa markang 48 plus. Nabawasan ng 18 puntos.

Kumbaga sa pag-aaral ng isang estudyante noong ang inyong lingkod ay nagtuturo pa sa De La Salle Greenhills sa Mandaluyong City, kapag bumaba o sumubsob ang grade o marka ng tinuturuan kong mga estudyante, iisa ang nasasabi ko sa kanila at sa mga magulang kapag bigayan ng report card: Study more o mag-aral pang mabuti upang tumaas ang marka. ‘May talino po ang inyong anak’, nasasabi ko sa mga magulang. ‘Ang kailangan po lamang ay dagdagan ang sipag at tutok sa pag-aaral’. Mangangako naman ang mga estudyante ko sa kanilang magulang, kaharap ang inyong lingkod. ‘Mommy, promise, I will study more talaga. Pagbubutihin ko na ang aking pag-aaral’.

Sa pagsubsob ng satisfaction at trust ratings ng Pangulo, may sinisi si Speaker Alvarez. Nagpakita ng kakitiran ng isip na ‘tila hindi makapaniwala sa survey. Binira niya ang mga obispo ng Simbahang Katoliko na pumupuna sa Pangulong Duterte dahil sa madugong giyera kontra droga. Banat ni Speaker Alvarez, “The Church should clean up its ranks of pedophile first.” Tinukoy niya ang Catholic Bishops Conference of the Philippines (CBCP), na isa sa mga pinagmumulan ng “ingay” na maaaring nagpasubsob sa satisfaction at trust ratings ng Pangulo, batay sa huling SWS survey.

Ayon pa kay Speaker Alvarez, “They should fix their priests first. They have many scandals. There are many pedophiles among them. They should fix their ranks first. Why don’t they scold...

their own priests?”

Ang banat ni Speaker Alvarez ay sinagot ng mga opisyal ng Simbahan na hindi niya dapat sisihin ang Simbahang Katoliko sa pagsubsob ng rating ng Pangulong Duterte. Ang pagsisi sa Simbahan ay isang paraan upang ilihis ang pansin ng publiko sa walang tigil na pagpatay sa giyera kontra droga. Ayon kay Caloocan Bishop Pablo Virgilio David, ang pagsubsob ng rating ay hindi dahil sa mga lider ng Simbahan kundi sa extrajudicial killings.

Marami na ang nagsabi na hindi dapat na maging mapanisi si Speaker Alvarez, na ang mga obispo ng Simbahan ang binabanatan niya at binabagsakan ng sisi. Ang magandang magagawa niya ay tanggapin ang katotohanan, kahit pa ang Pangulo ay ibinoto ng may 16 na milyong Pilipino, na dahil sa nangyayaring mga pagpatay sa giyera kontra droga ay hindi na intact ang nasabing bilang ng mga bumoto, sapagkat nakararami pa rin sa mga Pilipino ang marunong magpahalaga sa buhay ng tao. Naniniwalang Diyos lamang ang may karapatang bumawi ng buhay ng tao.