MABUTING BALITA

Sinabi ni Jesus sa kanyang mga alagad: “Isipin n’yo ito: Kung nalaman lamang ng may-ari ng bahay kung anong oras ng gabi ang dating ng magnanakaw, hindi sana niya pababayaang looban ang kanyang bahay. Kaya maging handa kayo, dahil dumarating ang Anak ng Tao sa oras na hindi n’yo inaakala.”

Sinabi ni Pedro: “Panginoon, kanino mo ba sinasabi ang talinhagang ito, sa amin o sa lahat?”

Sumagot ang Panginoon: “Isipin n’yo ito: May tapat at matalinong katiwala na pangangasiwain ng panginoon sa kanyang mga tauhan para bigyan sila ng rasyon sa tamang oras. Kung sa pagdating ng kanyang panginoon ay matagpuan siya nitong tumutupad nang gayon, mapalad ang lingkod na iyon. Talagang sinasabi ko sa inyo, pangangasiwain siya nito sa lahat nitong ari-arian. Ngunit maaari namang maisip ng lingkod na iyon: ‘Matatagalan pang dumating ang panginoon ko’ at simulang pagmalupitan ang mga utusang lalaki at babae, at kumain, uminom at maglasing. Ngunit darating ang panginoon ng lingkod na iyon sa araw na hindi niya inaasahan at sa oras na hindi niya nalalaman. Palalayasin niya ang katulong na ito at pakikitunguhang gaya ng mga ‘di dapat.” PAGSASADIWA:

Hihingan nga ng marami ang binigyan ng marami at hihingan nang higit ang pinagkatiwalaan nang higit. — Hindi tayo hihingan o paghahanapan ng Diyos ng bagay na wala sa atin. Hindi rin naman Niya tayo aasahang magbigay ng anumang bagay na sa tingin Niya ay lampas na sa ating kakayahan para maibigay.

Iba’t iba ang inaasahan sa atin ng Diyos sapagkat iba’t iba rin naman ang mga biyaya at kakayahang ipinagkakaloob sa bawat tao. Mas malaki ang inaasahan ng buong sambayanang Pilipino sa ating Pangulo kung ikukumpara sa inaasahan sa isang ordinaryong mamamayan.

Mas higit naman ang inaasahan ng Diyos sa mga paring-lingkod kung ikukumpara sa Kanyang inaaasahan sa mga sakristan o sa mga simpleng katiwala ng Iglesya. Ganun pa man, may kanya-kanyang pananagutan tayo sa Diyos sa buhay na ito.