MABUTING BALITA

Sinabi ni Jesus sa mga tao: “Kapag nakita n’yong tumataas ang ulap sa kanluran, kaagad n’yong sinasabi, ‘Uulan,’ at ganoon nga ang nangyayari. At kung umiihip naman ang hangin galing timog, sinasabi n’yong ‘Magiging napakainit’, at nangyayari nga ito. Mga mapagkunwari! Nabibigyan n’yo ng kahulugan ang anyo ng lupa at Langit pero bakit hindi n’yo sinusuri kung ano ang panahong ito?

“At ba’t hindi kayo mismo ang makapagpasya kung ano ang tama? Sa pagpunta mo sa maykapangyarihan kasama ng kalaban mo, sikapin mong makipagareglo sa kanya sa daan; baka iharap ka sa hukom, at ibigay ka naman ng hukom sa pulis para ipakulong sa bilangguan. Sinasabi ko sa iyo: Hindi ka makalalabas doon hanggang hindi mo nababayaran ang kahuli-hulihang sentimo.” PAGSASADIWA:

Nabibigyan n’yo ng kahulugan ang anyo ng lupa at Langit pero bakit hindi n’yo sinusuri kung ano ang panahong ito?— Ang mga eskriba at mga Pariseo sa kapanahunan ni Jesus ang mga taong kinikilala sa larangan ng pagtuturo at pagtupad sa mga Batas na itinakda ni Moises. Alam nila ang mga Batas na nagbabawal na gumawa ng masama. Batid din nila ang mga kautusan na nag-aakay sa tao na gumawa ng mabuti.

Sa kabila ng kanilang angking kaalaman at karunungan ay hindi nila nakita at hindi nila tinanggap ang katotohanang ipinahayag ni Jesus sapagkat sarado ang kanilang puso. Dahil sa kanilang bulag na pananampalataya at katigasan ng puso, dala na rin ng kanilang pagiging mapagmataas, hindi nila nakita kay Jesus ang Dakilang Tanda na ipinadala ng Diyos. Sadyang tanging ang mga may mababang-loob at may malinis na puso lang ang tunay na nakakakita sa Diyos.