Divina, ex-solon, 44 pa sa lookout bulletin

Isinailalim kahapon sina University of Sto. Tomas (UST) Civil Law Dean Nilo Divina at dating Isabela Rep. Edwin Uy sa Immigration Lookout Bulletin Order (ILBO) kasama ang 44 na iba pa sa pagkakasangkot sa pagkamatay ng biktima ng hazing na si Horacio Tomas “Atio” Castillo III.

Inatasan ni Justice Secretary Vitaliano Aguirre II si Bureau of Immigration (BI) Commissioner Jaime Morente na isailalim ang 47 katao sa ILBO bilang “persons-of-interest” kaugnay ng kaso sa pagkamatay ng Aegis Juris fraternity neophyte.

Ang paglalabas sa updated na ILBO ay kasunod ng mga rebelasyon ng Aegis Juris fratman na si Marc Anthony Ventura, na piniling maging state witness sa kaso.

Bukod kina Divina at Uy, na kapwa law partners at trustees ng fraternity, nasa ILBO na rin sina Alex Bose, Alex Cairo, Alexander Flores, Allan Christopher Agati, Alvin Dysangco, Arnel Bernardo, Arthur B. Capili, Arthur Capili, Atty. Alston Kevin Anarna, Atty. Cecilio Jimeno, Atty. Cesar Gaba dela Fuente, Atty. Cesar Ocampo Ona, Atty. Edzel Bert Canlas, Atty. Ferdinand Rogelio, Atty. Gaile Dante Acuzar Caraan, Atty. Henry Pablo Jr., Atty. Jet dela Peña Villaroman.

Isinailalim din sa ILBO sina Atty. Manuel Ventura III, Atty. Marvi Abo, Atty. Michael Vito, Atty. Nino Servanez, Brian Bangui, Cesar Tirol, Chuck Siazar, Edric Pilapil, Emmanuel Velasco, Gabriel Robeniol, Henry Pablo Jr., Karl Matthew Villanueva, Kim Cyrill Rogue, Lennert Bryan Galicia, Leo Lalusis, Luis Kapulong, Manny Ventura, Michael Joseph Fernandez, Nathan Anarna, Oscar Ce, Paulino Yusi, Robin Ramos, Romeo Rivera Laboga, Ronald Cheng, RR Magbuhos, Sam Cagalingan, Vicente Garcia, William Meginie, at Zach Abolencia/Zach Abulencia.

Una nang napabilang sa ILBO ang mga kasalukuyang opisyal ng Aegis Juris na sina Arvin Balag, Mhin Wei Chan, Axxel Munro Hipe, John Onofre; gayundin sina Ventura, Ged Villanueva, Milfren Alvarado, Daniel Ragos, Dave Felix, Joshua Joriel Macabali, Jason Adolfo Robinos, Ralph Trangia, Ranie Rafael Santiago, Danielle Hans Matthew Rodrigo, Carl Matthew Villanueva, Aeron Salientes, Marcelino Bactang, Zimon Padro, Jose Miguel Salamat, at John Paul Solano.

Samantala, kumpiyansa naman si Aguirre na matibay ang testimonyang inilahad ni Ventura, dahil malinaw nitong naisalaysay ang lahat ng detalye sa hazing rites kay Atio.

Sinabi naman ni Sen. Panfilo Lacson na sinayang ni Solano ang tsansa na maging testigo sa kaso kasunod ng paglutang ni Ventura.

Matatandaang kay Lacson sumuko si Solano makaraan ang ilang araw na pagtatago kasunod ng paghahatid nito kay Atio sa Chinese General Hospital.