Maaaring hindi ligtas sa polio ang Mimaropa --DoH

INIHAYAGng pinuno ng Department of Health’s (DoH) office sa Mimaropa nitong Martes na patuloy ang pagbabakuna ng kanyang opisina para sa polio, lalo na sa mga liblib na lugar, dahil nangangamba siyang hindi ligtas sa polio ang rehiyon.

Ang Mimaropa ay binubuo ng Mindoro Oriental at Mindoro Occidental, Marinduque, Romblon, at Palawan.

“Maganda pa rin daw ang standing natin sa polio, wala na raw masyadong kaso, zero polio na raw tayo. But they have not seen all those areas sa bundok, ‘yung mga islang maliliit. Nagugulat ako, may polio pa pala doon but they are not reporting it,” pahayag ni DoH-Mimaropa regional director, Dr. Eduardo Janairo, sa Philippine News Agency (PNA) sa isang panayam.

Sinabi ni Janairo na idodokumentaryo nila ang mga kaso ng polio, syphilis at iba pang mga sakit sa mga liblib na lugar para maging ebidensiya, dahil nahihirapan ang municipal health officers na dapat na nag-uulat ukol dito, na puntahan ang mga naturang lugar.

Binigyang-diin niya ang importansiya ng bakuna para sa polio at aniya, “Ang mahalaga, gamutin ‘yan at ang vaccine, dapat palaganapin sa island para hindi na maulit.”

Ang Oktubre 24 ay tinaguriang World Polio Day.

Noong 2000, idineklara ng World Health Organization (WHO) na poliofree na ang Pilipinas makaraang maidokumento ang huling kaso ng polio sa bansa noong 1993.

Gayunman, bilang paghahanda, patuloy pa rin ang pagbabakuna ng DoH kontra polio upang mapigilan ang paglaganap ng naturang sakit.

Ayon sa WHO, ang poliomyelitis ay isang mataas na infectious viral disease na karaniwang dumadapo sa mga bata. Naihahawa ang virus sa ibang tao sa pamamagitan ng fecal-oral route o sa pamamagitan ng kontaminadong tubig o pagkain.

Ang sintomas nito ay pagkakaroon ng lagnat, pagkahapo, pananakit ng ulo, pagsusuka, paninigas ng leeg, at pananakit ng katawan. Sa ilang kaunting kaso, naging sanhi ang sakit ng pagkaparalisa, na kasadalasan ay nagiging permanente, saad ng organisasyon.

Walang lunas sa polio. Maaari lamang itong pigilan sa pamamagitan ng immunization.