US$1B ayuda ng Japan sa PH infra
TOKYO – Nangako ang Japan ng kabuuang mahigit US$ 1 bilyon para sa tatlong infrastructure projects sa Pilipinas sa pamamagitan ng pagpalitan ng mga dokumento sa pagkakaloob ng yen loan nitong Lunes ng gabi.
Ayon sa Ministry of Foreign Affairs (MOFA) ng Japan, isa sa tatlong proyektong ito ang Cavite Industrial Area Flood Risk Management Project na may loan provision na Y15.928 bilyon (P7.3B).
Ito ay sinaksihan nina Pangulong Rodrigo Duterte at Japanese Prime Minister Shinzo Abe bago ang kanilang Joint Press Statement sa Tokyo nitong Lunes ng gabi.
Nangako rin si Abe na magkakaloob ng yen loan na hanggang Y104.53 (P47.6B) para sa Metro Manila Subway Project (Phase 1), at yen loan na Y9.399 bilyon (P4.3B), para sa Arterial Road Bypass Project (Phase III) sa Philippine-Japan Friendship Highway sa Plaridel, Bulacan. MALAKAS NA KOOPERASYON
Samantala, nangako ang mga gobyerno ng Pilipinas at Japanese na palalakasin ang kanilang kooperasyon sa siyam na larangan sa Pilipinas.
Sa kanilang joint statement, muling pinatibay nina Pangulong Duterte at PM Abe ang “strategic partnership” ng dalawang bansa sa infrastructure development sa pagpapabuti sa power generation efficiency; paglikha ng trabaho at pagpapabuti sa living standards; edukasyon sa pamamagitan ng internship opportunities sa mga kumpanyang Japanese; ayuda sa Mindanao, partikular sa rehabilitasyon ng Marawi City at pagpapabuti sa Japan- Bangsamoro Initiatives for Reconstruction and Development (J-BIRD); public safety, paglaban sa illegal drugs at counter-terrorism o maritime safety measures; information and communications, sa pagpapatupad ng digital transition ng television broadcasting sa Pilipinas at pag-establisa ng broadband infrastructure.
Sa larangan ng kalikasan, makikipagtulungan anggobyerno sa pagdebelop ng Waste-to-Energy power generation infrastructure sa mga piling model cities sa Pilipinas at Japan; sa agrikultura, isusulong ng dalawang bansa ang agricultural mechanization sa Pilipinas; at sa disaster risk reduction, magkakaloob ang Japan ng technical assistance sa Pilipinas lalo na sa flood control, weather observation, at forecasting at warning system.