Isinusulong ang kahalagahan ng environmental urban planning
MAGDARAOS ang Philippine Institute of Environmental Planners ng 26th National Convention nito sa Nobyembre 8 at 9, 2017 sa Seda Vertis North, Quezon City upang isulong ang kamalayan hinggil sa importansiya ng environmental urban planning mula sa perspektibo ng local hanggang national governance sa mas malawak na kaalaman ng mga tagapagdesisyon.
May temang “Sustainable Cities and Communities for the Urban Century”, layunin ng aktibidad na tutukan ang pangangailangan ng bansa ng mabuting urban planning na babalanse sa konsiderasyon ng socio- political, cultural, economic, at environmental issues na nakakapag- ambag sa mas tiyak na kaunlaran.
Aabot sa kalahati ng populasyon ng bansa ang naninirahan sa mga siyudad bilang resulta ng ilang dekadang real estate development.
Gayunman, inilayo ng mga konkreto at bakal na imprastruktura ang publiko mula sa natural na mundo, na nagiging sanhi ng problema sa kalusugan at sanitasyon, nanatiling seryosong problema ang banta ng mga natural na kalamidad gaya ng bagyo at lindol, habang palala nang palala ang problema sa trapiko, baha, at basura.
Nagbibigay ng balanse ang sustainable urban planning sa pagitan ng mga imprastrukturang likha ng tao at sa natural na kapaligiran.
Nakatakdang maghayag ng talumpati si Quezon City Mayor Herbert Bautista kasabay ng “World Town Planning Day” na magsisimula sa Nobyembre 8.
Inaanyayahan ang lahat ng environmental planner ng Philippine Institute of Environmental Planners na dumalo, pati na rin ang mga kinatawan ng gobyerno at mga lokal na pamahalaan, mga ahensiya ng pamahalaan, mga non- government organization, mga pribadong negosyo, mga developer, mga arkitekto, mga contractor, mga guro at iba pang kasapi ng akademya, at lahat ng partidong interesado sa paglikha ng mga lungsod at komunidad na bagamat maunlad ay nakikinabang pa rin sa benepisyong hatid ng kalikasan.