Epektibong tagapagsalita
NANG lumutang ang masalimuot na isyu hinggil sa pagpapalit ni Pangulong Rodrigo Duterte ng kanyang spokesman, bigla namang gumitaw sa aking kamalayan ang pagiging epektibong tagapagsalita ni dating Pangulong Fidel V. Ramos.
Sa lahat halos ng pagkakataon, mismong si FVR ang umaaktong spokesman ng kanyang administrasyon, lalo na sa mga kontobersiyal na problema na gumigiyagis sa kanyang pamumuno.
Bilang minsang naging bahagi ng kanyang official family, hindi ko malilimutan ang pamumuno ni FVR sa lingguhang press conference sa Malacañang.
Dinadaluhan ito ng mga kinatawan ng iba’t ibang local at foreign media outfit. Madalas kaysa hindi, ang kanyang mga press officers ay nagiging moderator na lamang samantalang ang Pangulo ang halos hindi mapigil sa pagpapaliwanag ng mga makabuluhang isyu na dapat sulatin ng mga mamamahayag. Masakit pakinggan, ngunit laging nagbibiro ang ating mga kapatid sa media na kami ay nagmimistulang dekorasyon na lamang kapag pinangungunahan ng Pangulo ang pulong-balitaan.
Gayunman, binibigyan din naman ni FVR ang kanyang mga press officers ng makatuturang tungkulin na linawin ang mga isyu na nais maliwanagan ng mga mamamahayag. Dapat nga lamang naming tiyakin na ang mga pagpapaliwanag ay nakaangkla sa mga paninindigan na laging binibigyang-diin ng Pangulo.
Maaaring makasarili ang aking pananaw, subalit ang masasalimuot na isyu ay buong- linaw na naipapaliwanag ng Pangulo, lalo na ang pakikipanayam ng mga local at foreign correspondents.
Mawalang- galang na sa nakalipas at maging sa kasalukuyang administrasyon, ang gayong sistema na isinulong ni FVR ay hindi ko nasaksihan sa mga press conference.
Karapatan ng sinumang Pangulo na magtalaga ng kani- kanilang mga spokesman na maglalahad ng kanilang mga paninindigan sa mga isyu na dapat mabatid ng ating mga kapatid sa propesyon.
Karapatan nilang humirang ng kahit ilang tagapagsalita na inaakala nilang lalong magiging epektibo sa...
paglalantad ng mga patakaran, lalo na ang mga programa, na ipinatutupad ng kanilang administrasyon.
Subalit ang ganitong sistema ay malimit na humahantong sa paghahayag ng magkataliwas na pangangatwiran na kung minsan ay lihis sa mismong paninindigan ng Pangulo. Magkakaiba ng tone, wika nga. Nagiging dahilan ito ng magkakasalungat na interpretasyon ng mga patakarang binibigyang-diin ng administrasyon.
Sa kabila ng lahat ng ito, naniniwala ako na ang sinumang Pangulo ang talagang epektibong spokesman ng kanyang administrasyon.