Matatapang na hakbang tungo sa kaunlaran, isusulong sa APEC

Inaasahang magsasagawa ang Pacific Rim leaders ng mas matatapang na hakbang para higit na lumalim ang regional economic integration at matiyak ang sustainable, innovative at inclusive growth sa kanilang summit ngayong linggo.

Magtitipun-tipon ang mga lider mula sa 21-miyembro Asia Pacific Economic Cooperation ( APEC) simula Biyernes para sa dalawang araw na mga pag-uusap sa coastal resort city ng Da Nang, Vietnam.

“Being an economic cooperation organization, one of the key themes is deepening regional integration,” sinabi ni Philippine Foreign Affairs Undersecretary Manuel Teehankee sa panayam ng media kamakailan sa Da Nang.

Ayon kay Teehankee, inaasahang tatalakayin din ng APEC leaders ang mga hakbang upang matiyak makikinabang ang lahat sa pagunlad sa harap ng globalisasyon.

Isa pang mahalagang temang pag-uusapan ng APEC leaders ay ang “promotion of sustainable, innovative and inclusive growth.”

Kabilang sa mga lider ng mundo na dadalo sa APEC summit sina President Rodrigo Duterte, US President Donald Trump, Russian President Vladimir Putin, Chinese President Xi Jinping, Canadian Prime Minister Justin Trudeau, at Australian Prime Minister Malcolm Turnbull.

Pinili ng Vietnam, ang APEC chairman ngayong taon, ang “Creating New Dynamism, Fostering a Shared Future” bilang tema ng summit.

Ngayong araw, inaasahang makikipagdayalogo ang mga lider sa APEC Business Advisory Council sa Furama Resort.

Kinagabihan, opisyal na tatanggapin ni Vietnam President Tran Dai Quang ang APEC leaders at kanilang mga kabiyak sa gala dinner sa Sheraton Da Nang Resort.