Manggugulo sa ASEAN summit ‘di makakalapit

Inatasan ni Manila Mayor Joseph “Erap” Estrada ang Manila Police District (MPD) na harangin ang mga grupong nagbabalak magsagawa ng kilos-protesta malapit sa mga lugar na pagdarausan ng 31st Association of Southeast Asian Nations (ASEAN) Summit and Related Meetings sa susunod na linggo.

Kaugnay sa naunang ipinahayag ng National Capital Regional Police Office (NCRPO), sinabi ni Estrada na mahigpit ding ipagbabawal ang anumang demonstrasyon sa mga hotel na tutuluyan ng mga delegado, heads of states, at iba pang VIPs.

“Definitely we will not allow these militant groups to go the vicinities of the ASEAN Summit sites, including the US Embassy and the hotels along Roxas Boulevard and adjacent areas where the delegates are staying,” sabi ng alkalde.

Ani Estrada, papayagan lamang ang mga kilos-protesta sa Plaza Miranda sa Quiapo at sa Liwasang Bonifacio at “off limits” ang Roxas Boulevard, US Embassy, at ang mga hotel.

Sinabi ni MPD director P/Chief Supt. Joel Coronel na isasara nila ang paligid ng mga lugar na pagdarausan ng summit, kabilang ang Cultural Center of the Philippines (CCP) Complex, SM MOA Arena at mga hotel tulad ng Manila Hotel, Manila Diamond Hotel, New World Manila Bay, Pan Pacific, at Century Park Sheraton.