Kapangahasang winasak

SAunang pagkakataon, ngayon lamang natin nasaksihan ang pagwasak ng pamunuan ng Metro Manila Development Authority (MMDA) sa mga barangay hall na sinasabing buong kapangahasang ipinatayo ng mismong mga barangay officials sa kani-kanilang mga nasasakupan. Matatagpuan sa ilang lugar sa Metro Manila, ang naturang mga istruktura at iba pang kubol ay ipinatayo sa mga sidewalk at sa gilid ng mga kalye na hindi na halos madaanan ng mga sasakyan.

Dati, tindahan at talyer lamang ang ginigiba ng mga tauhan ng MMDA; ngayon, mismong mga barangay hall ang winawasak nila matapos iutos ni Pangulong Duterte ang walang habas na pag-aalis ng sagabal sa mga kalsada bilang bahagi ng paglutas sa matinding problema sa trapiko. Katunayan, tahasang iniutos ng Pangulo sa MMDA ang pagsasampa ng demanda sa mga barangay officials na magiging balakid sa kanyang direktiba.

Sa walang patumanggang pagwasak ng MMDA sa nabanggit na mga istruktura, nalantad ang sukdulan ng kapangahasan ng ilang barangay officials sa paglabag sa batas. Isipin na lamang na nagpatayo sila ng mga barangay hall sa mga lugar na ipinagbabawal ng batas. Hindi ba ang mga sidewalk ay daanan lamang ng mga mamamayan at ang mga kalye ay para lamang sa mga sasakyan?

Dahil dito, maliwanag na sila rin ang pasimuno sa pagpapahintulot sa mga vendors na makapagpatayo ng mga tindahan sa bawal na mga lugar; at sila rin ang maliwanag na nagbigay ng bendisyon, wika nga, sa mga vulcanizing shop, car wash station at parking area. Ito ang dahilan kung bakit talamak ang double parking sa ilang kalsada sa Metro Manila.

Sa ganitong kapangahasan ng ilang barangay officials sa pagtalampak sa umiiral na mga kautusan, hindi ba dapat din silang sisihin sa mabagal na paglipol ng...