Intel operatives: ‘Dapat lang sibakin si Santiago sa DDB!’
MAINIT na pinagtatalunan ngayon sa social media at maging ng mga kolumnista sa main stream media ang pagbibitiw ni General Dionisio Santiago (ret.) bilang chair ng Dangerous Drugs Board (DDB) – kung kusa ba siyang nagbitiw o pinagbitiw siya ni Pangulong Rodrigo R. Duterte. Nagdudumilat sa mga pahayagan ang headline na, “Santiago SACKED!” at ang iba naman ay, “Santiago QUITS!” Eh, ano ba talaga?
Nang tanungin si Santiago ng mga mamamahayag, ang malinaw na sagot niya ay: “The President has decided and I respect his decision that is why I followed what Medialdea told me. Quit!”
At ang punu’t dulo umano ng “galit” ni Pangulong Duterte, ayon naman sa mga nagtatanggol at pumupuri sa ginawang pagbibitiw ni Santiago – ay nang kondenahin nito ang ipinagawang 10,000 bed drug rehabilitation center sa Nueva Ecija, at sa pagsasabing isang malaking pagkakamali ang drug war ng pamahalaan.
“I never said that the drug war was a mistake. It was the Inquirer’s headline. Kumokontra daw ako kahit hindi. Pinagtatanggol ko,” ang sabi ni Santiago sa panayam sa radio dzIQ 990. Naniniwala siyang ginamit umano ito ng mga “We Bulong” na nakapaligid kay Pangulong Duterte na mainit sa kanya dahil sa pagiging “Contra-Pelo” niya sa sa mga ito.
Iba naman ang paniwala ng mga kaibigan ko sa “Intel community” na nagsasabing – sa isang banda, ay hindi umano dapat na naiupo sa Dangerous Drug Board ( DDB) si Santiago bilang chairman. Ang katwiran nila, “mantsado” na si Santiago ng laro sa mundo ng ipinagbabawal na gamot, kaya wala na itong karapatang makakuha ng kahit anong puwesto sa pamahalaan, lalo pa’t may kaugnayan ang trabaho sa pakikibaka sa sindikato ng droga sa bansa.
Ang ilang beses ko nang narinig sa kanila ang kasong inimbestigahan ng mga ahente ng National Bureau of Investigation (NBI) noong si Santiago pa ang pinuno ng Philippine Drug Enforcement Agency (PDEA). Ito ang kasong “NBI vs. Dionisio Santiago NPS docket no. XVI-INV-12K-00491” na umano’y dapat na-under automatic review na ng Department of Justice (DoJ)… Na pakiramdam nila ay wala ring mangyayari dahil mismong si Justice Secretary Vitaliano Aguirre ay nagpasaring na gusto niyang si Santiago ang maupo bilang director general ng noo’y nabakanteng Bureau of Corrections (BuCor), matapos magbitiw ni Atty. Benjamin “Kidlat” delos Santos.
Sa pagkakaalam ko nga pala – malaki ang naging papel ni “Kidlat” sa pagkakahuli sa anak ng “reyna ng mga drug lord sa bansa” na si Yu Yuk Lai. Kahit nakapiit ito sa Women’s Correctional sa Mandaluyong City, tuloy pa rin ang pagtutulak nito ng droga gamit ang anak niya bilang courier. Ang mga escort niya, siyempre pa, ay ang mga pulis at ang safehouse nito – ilang metro lang ang layo sa Malacañang!
Ang kaso laban kay Santiago ay umiikot sa pag-upa ng PDEA ng “private incinerator firm” upang magsunog sa drogang nakumpiska...