Mga ina, suportado ang DoH laban sa HPV sa kabataan

Nagsama- sama ang mga ina upang suportahan ang Department of Health ( DoH) sa pagpapalaganap ng kamalayan sa kabataan hinggil sa Schoolbased Human Papillomavirus ( HPV) Immunization program na inilunsad ng ahensiya sa Addition Hills Integrated School sa Mandaluyong City.

Mahigit 180 kababaihang estudyante mula sa ikaapat na baitang ng nasabing paaralan ang tumanggap ng quadrivalent HPV vaccine, bilang bahagi ng pampaaralang pagbabakuna ng DoH.

Bilang pakikiisa, dumalo sa pagbabakuna ang mga nanay at lola ng mga estudyante. Sa pamamagitan ng pagpapabakuna, nabibigyan ng proteksiyon ang mga bata laban sa iba’t ibang uri ng sakit tulad ng kulugo sa ari o genital warts, cancer ng puwet at lalamunan, cancer sa ari ng lalaki, at cancer sa puwerta at vulva ng mga babae.

Ang HPV vaccine ay isa sa mga bagong bakunang isinama ng DoH sa kanilang national immunization program. Ang nasabing pagpapabakuna sa HPV ay naunang inilunsad sa mga health center sa 20 probinsiya. Ngayong taon, sa pagtutulungan ng Department of Education ( DepEd) at Department of the Interior and Local Government ( DILG), ginawa itong school- based upang matiyak na ang mga batang babae na nasa siyam hanggang 13 taong gulang ay mailigtas sa HPV pagdating ng araw.

May pahintulot din ang naturang pagbabakuan mula sa mga magulang.

Ayon sa mga pananaliksik, ang impeksiyong dulot ng HPV ang dahilan sa 99 porsiyento ng mga kaso ng kanser sa kuwelyo ng matres o cervical cancer sa kababaihan, na siya ring ikalawang sanhi ng bilang ng mga kamatayang may kinalaman sa cancer sa buong mundo. Sa Pilipinas, mahigit 6,000 bagong kaso ng cervical cancer ang naitatala kada taon.

Ang Addition Hills Integrated School sa Mandaluyong ang napiling pagdausan ng school- based HPV Immunization Program ng DOH sa National Capital Region o NCR. Inilunsad din ang pangrehiyong programa sa mga lalawigan ng Nueva Ecija, Zambales, at Pampanga.