Noynoy nagpiyansa na
Personal na nagtungo kahapon si dating Pangulong Benigno S. Aquino III sa Sandiganbayan upang maglagak ng P40,000 piyansa sa mga kinahaharap niyang kaso ng graft at usurpation of authority, na isinampa ng Office of the Ombudsman kaugnay ng engkuwentro sa Mamasapano, Maguindanao noong 2015, na ikinasawi ng 44 na police commando.
Pasado 4: 00 ng hapon kahapon nang dumating sa Sandiganbayan si Aquino kasama ang kanyang mga kapatid na sina Ballsy, Pinky, at Viel, gayundin ng mga kaalyado niya sa Liberal Party na sina Senators Bam Aquino at Franklin Drilon.
Naroon din ang mga dati niyang tagapagsalita na sina Atty. Edwin Lacierda at Atty. Abigail Valte, at ilang tagasuporta niya na pawang nakasuot ng dilaw na T-shirt.
Naglagak ng piyansa ang dating Pangulo ilang oras makaraang ma-raffle ang kanyang kaso sa Sandiganbayan Third Division, na pinamumunuan ng kanyang appointee na si Presiding Justice Amparo Cabotaje-Tang.
Sa isang panayam ng mga mamamahayag, iginiit ni CabotajeTang na hindi siya mag-i-inhibit sa kaso at pananatilihin niya ang kanyang neutrality.
“We will just apply the rules as we have done in the past, irrespective of the personalities involved in the cases,” sinabi kahapon ni CabotajeTang. “The fact will never influence whatever action we will take in the case. We will act objectively based on what is before the court.”
Nahaharap din sa mga kaparehong kaso ang mga kapwa akusado ni Aquino na sina dating Philippine National Police (PNP) chief Director General Alan Purisima, at dating Special Action Force (SAF) Director Getulio Napeñas, na lilitisin naman sa Sandiganbayan Fourth Division.