Inalon habang nagse- selfie, nalunod
BALER, Aurora - Patuloy ang search at rescue operations ng mga awtoridad sa isang medical technologist na tinangay ng alon nitong Miyerkules sa tapat ng isang beach resort sa Sitio Diguisit, Barangay Zabali, Baler, Aurora habang nagse-selfie sa rock formation sa lugar.
Kinilala ni Municipal Disaster Risk Reduction and Management Office (MDRRMO) Chief Gabriel Llave ang biktimang si Justine Paul Delos Santos, 27, medical technologist sa Dr. Jose Rodriguez Memorial High School Hospital sa Caloocan City, at tubong Quezon City.
Nagse-selfie umano sa lugar ang biktima kasama ang mga kasamahan sa trabahong sina Bryan Lee Gonzales, 26; Mayabell Malapitan, 27; at Bryan Moscada, 22, nang bigla umano silang dinaluyong ng malaki at malakas na alon. Nagkahiwa-hiwalay umano sila hanggang nawala si Delos Santos. Habang sinusulat ang balitang ito ay nagpapatuloy pa ang retrieval operation ng MDRRMO, pulisya, Philippine Coast Guard, at rescue volunteers sa biktima.