2 tanod ginulpi sa pangongolekta ng abuloy
CONCEPCION, Tarlac - Dalawang barangay tanod ang iniulat na ginulpi ng tatlo nilang kabarangay na nagreklamo sa pangongolekta nila ng abuloy sa Barangay San Juan, Concepcion, Tarlac, nitong Huwebes ng gabi.
Kinilala ang mga biktimang sina Villamor Olarte, 50, chief tanod; at Domingo Garcia, 50, kapwa tanod ng Bgy. San Juan, habang ang mga suspek ay sina Bryan Andajer, 20; Rommel Baluyut, 25; at Raymart Baluyut, ng Bgy. San Juan.
Napag-alaman na dakong 8:00 ng gabi nang biglang lumusob ang tatlong suspek sa Barangay Hall ng San Juan at pinagmumura ang dalawang tanod dahil sa paniningil umano ng abuloy sa patay hanggang sa pagtulungang gulpihin ang mga tanod.
Kaagad namang rumesponde ang pulisya at inaresto ang tatlong suspek na nahaharap ngayon sa direct assault at alarm and scandal.