Santiago katatalaga pa lamang, dinismiss na
HINDI pa nagtatagal ang pagkakatalaga kay Ret. Gen. Dionido Santiago bilang Chairman ng Dangerous Drug Board, pinagbitiw na siya ni Pangulong Duterte kamakailan. Hindi nagustuhan ng Pangulo ang kanyang paghamak sa mega rehabilitation facility sa Kampo ng Army sa Laur, Nueva Ecija na “mistake and impractical” ito. Sa panayam sa kanya sa telebisyon, sinabi niya na magastos ang pagmamantine nito. Bakit nga ba hindi, eh 100,000- square meter ang lawak nito at may 10,000 bed capacity. Marami nga namang empleyado, instrumento at kagamitan ang kinakailangan upang mahusay na mapatakbo. Mas magandang nagamit daw ang pondo sa pagpatayo at pagmamantine nito sa community- based rehabilitation center. “Wala namang dahilan na batikusin ang mega rehab center”, sabi ng bagong spokesperson ng Pangulo na si Harry Roque, “walang namang salapi ng gobyerno ang nagamit para magawa ito.” Ang mega rehabilitation facility ay naitayo sa pondong ipinagkaloob ng isang negosyanteng Intsik.
Totoo, pondo ng dayuhan ang ginamit para sa mega rehabilitation facility, pero, paano ang pagmamantine nito? Ang mahalaga, epektibo ba nitong matutugunan ang layunin kung bakit ito itinayo? Pinapanigan ni Caloocan Bishop Pablo Virgilio David si Gen. Santiago sa pagsasabi na ang mas maliit na rehab center na nakabatay sa pamayanan ay higit na epektibo para mabawasan ang mga nalulong sa droga. Binanggit niyang halimbawa ang mga kasalukuyang community-based rehab center na naipundar sa pagtutulungan ng pamahalaang lokal at ng Diocese ng Caloocan. Ang layunin ng mga ito, aniya, ay tulungan ang mga gumagamit ng droga na iwan na ang bisyo sa tulong ng kanilang pamilya, kapitbahay, kaibigan at patuloy na pagsubaybay sa kanila sa pamamagitan ng group meeting tulad ng Narcotics Anonymous Program.
Ayon kay Bishop, anim na grupo na ang nagtapos mula nang magsimula ang rehab program noong Oktubre ng nakaraang taon. Nito lamang Oktubre 20, nasa 150 ang nagtapos sa programa, ayon sa kanya. Dahil nagawa na ang mega rehab center, aniya, puwede na itong gamitin para sa mga sumuko sa drug war na kailangan ang in-house rehabilitation.
Itinayo ng Pangulo ang mega rehab center nang batikusin siya sa mga pagpatay sa umano’y mga sangkot sa droga. Hindi lang pagpatay ang nais niyang ipalabas kundi ang bigyan ng pagkakataon na magamot at magbago ang mga nalulong sa bisyo.
Kaya, bakit hindi magagalit ang Pangulo gayong minamaliit o hindi pinapahalagahan ang hakbang niyang ito sa paglapat ng lunas sa problema. Eh, kinampihan pa si Gen. Santiago ni Bishop David na bagong bisepresidente ng Catholic Bishops’ Conference of the Philippines, na matindi kung batikusin ang war on drugs ng Pangulo. Bukod dito, ipinakita pa ng Bishop na sa ginagawa nila sa Caloocan, upang mapagaling ang mga nalulong sa droga, talagang mali at hindi praktikal ang mega rehabilitation center na ipinagawa ng Pangulo.
Hindi ko na alam ngayon kung ano ang ibig sabihin ni Gen. Santiago, nang hingan siya ng paliwanag kung bakit siya pinagbitiw, na ang Pangulo ang higit na nakaalam kung ano ang mas mabuti.