L.A. detectives, ibinasura ang pedophilia investigation na isinampa ni Corey Feldman
IBINASURA ng Los Angeles police authorities ang imbestigasyon sa mga elegasyon ng pedophilia ni Corey Feldman.
Opisyal na nagbigay ang dating child actor ng police report hinggil sa kanyang sexual abusers nitong nakaraang linggo, nang hamunin siyang magbanggit ng pangalan nang lumabas siya sa show ni Dr. Oz Mehmet.
Isinuhestiyon ni Oz na kailangang tumawag ng pulis ang kanyang kinakapanayam, nang ulitin ng The Lost Boys star ang kanyang mga isiniwalat na siya ay ilang beses na inabuso ng mga lalaki noong siya ay teenager pa.
Tinawagan ni Corey ang Los Angeles Police Department sa show at nagsampa ng report laban sa aktor na si John Grissom, kasabay ng pangakong dadalhin niya sa korte ang mga pedophiles upang makamit ang hustisya.
Nitong Lunes, inihayag ni Feldman na nakipag-usap siya sa mga awtoridad sa California upang talakayin ang kanyang mga isiniwalat at kinumpirma ng mga imbestigador na pinag-aaralan nila ang mga alegasyon.
Gayunman, kinumpirma ng tagapagsalita ng LAPD na ibinasura na nila ang imbestigasyon. “We did investigate it but it’s out of (the statue of limitations) so we can no longer prosecute the case,” lahad ng tagapagsalita sa People magazine. Nagkomento naman si Feldman sa naganap at nagtweet ng: “MAYBE NOW U WILL #BELIEVE ME WHEN I SAY I NEED 2 DO IT MY WAY...”, kasama ang link ng artikulo ng E! News. Sa panayam ni Dr. Oz, isiniwalat ni Feldman na ibinigay niya sa mga opisyal ng Santa Barbara Police Department ang mga pangalan ng umano’y nangmolestiya sa kanya noong 1993, ngunit isinantabi lamang ang kanyang mga alegasyon. Sinabi naman ni Mehmet sa aktor na tinawagan niya ang Santa Barbara police officials, at sinabing wala na silang record ng statement ni Corey. Samantala, umaasa si Feldman na makakakalap ng pondong $10 million (£7.6 million) upang makagawa ng pelikula hinggil sa umano’y pang- aabusong naranasan niya at ng iba pa sa kamay ng mga manyak sa Hollywood. Kamakailan ay sinabi niya sa U. S. morning show na kailangan niya ang pera upang natiyak ang set at kukuha rin siya ng mga taong magpoprotekta sa kanya habang ginagawa ang pelikula.