27 nasaktan sa karambola
CONCEPCION, Tarlac - Aabot sa 27 katao ang duguang isinugod sa Concepcion District Hospital makaraang magkarambola ang limang behikulo sa SCTEX Road sa Barangay Talimundok San Miguel sa Concepcion, Tarlac, nitong Miyerkules ng gabi.
Sa imbestigasyon ni PO1 Emil Sy, sangkot sa karambola ang Mitsubishi Montero (conduction sticker: BOQ-165) na minamaneho ni Maverick Cordero, 28, may asawa, ng Taytay, Rizal, na may limang pasahero, gayundin ang Chevrolet Captiva (AAA-6083) na minamaneho ni Yao Shi, 31, Chinese, ng Taguig City, na apat naman ang pasahero.
Sangkot din sa karambola ang Nissan Urvan (TJI-269) na minamaneho ni Jennilyn Mercado, 41, may asawa, ng San Fernando City, Pampanga, na may tatlong sakay; ang Isuzu Crosswind (NXQ-637) na minamaneho ni John Leo Adolfo, 33, may asawa, ng Antipolo City, Rizal, na may anim na pasahero.
Tatlo naman ang lulan sa Nissan Navara (ATA-2029) na minamaneho ni Leo Adolfo, 67, may asawa, ng Antipolo City.